لاک ڈاؤن سے متعلق نتیش کمار کا جائزہ اجلاس

ریاست بہار کے وزیراعلی نتیش کمار نے کورونا وائرس سے متعلق چیف سکریٹری اور دیگر اعلی عہدیداروں کے ساتھ ایک اعلی سطحی جائزہ اجلاس منعقد کیا۔ اس اجلاس میں انہوں نے مہاجر مزدوروں کے مسائل کو حل کرنے کی ہدایت دی۔

حکومت کی جانب سے کیے جارہے کام کے بارے میں معلومات دیتے ہوئے محکمہ تعلقات عامہ کے سیکریٹری انوپم کمار نے کہا کہ روزگار کی فراہمی حکومت کی اولین ترجیح ہے۔

وزیر اعلی نتیش کمار نے کورونا وائرس سے متعلق چیف سکریٹری اور دیگر اعلی عہدیداروں کے ساتھ ایک اعلی سطحی جائزہ اجلاس منعقد کیا، اجلاس میں وزیر اعلی نے عہدیداروں کو ہدایت دی کہ جو مہاجر مزدور بہار واپس آئے ہیں لیکن بہار میں ان کا بینک اکاؤنٹ نہیں ہے، جس کی وجہ سے وہ حکومت کے ذریعہ دی گئی رقم کا فائدہ حاصل نہیں کرسکے ہیں، لہذا ان کا بینک اکاؤنٹ کھلوا کر انہیں رقم دی جائے۔

وہیں ویڈیو کانفرنسنگ کے ذریعہ محکمہ تعلقات عامہ کے سکریٹری انوپم کمار، محکمہ صحت کے سکریٹری لوکیش کمار سنگھ اور اے ڈی جی جتیندر کمار نے کورونا انفیکشن اور لاک ڈاؤن سے پیدا ہونے والی صورتحال کے بعد حکومت کی جانب سے کیے جا رہے کاموں سے متعلق آگاہ کیا۔

انہوں نے کہا کہ کثیر تعداد میں واپس لوٹے مہاجر مزدوروں کا قرنطین میعاد ختم ہونے کے بعد انہیں فارغ کر دیا گیا ہے۔

ادھر بہار کے نائب وزیراعلیٰ سشیل کمار مودی نے 40 برس قدیم قانون کی ازسرنو تعریف کی، اور سختی سے عمل کرنے کا مطالبہ کیا ہے، سشیل مودی کا کہنا ہے کہ بین ریاست مہاجر مزدور ایکٹ 1979 کی عدم تعمیل کی وجہ سے مزدوروں کو مشکلات کا سامنا کرنا پڑا ہے۔

انہوں نے کہا کہ اگر مزدوروں کے لیے بنائے گئے قانون پرصحیح طریقے سے عمل کیا گیا تو ایک ریاست سے دوسری ریاست میں نقل مکانی کرنے والے کروڑوں مزدوروں کو کسی پریشانی کا سامنا نہیں کرنا پڑتا۔

بہار میں گاڑی نہیں چلانے والی خواتین کو لاک ڈاون کے دوران راحت ملی ہے، پٹنہ ہائی کورٹ نے ایک ممبر کو ایسی عورت کے ساتھ جانے کی اجازت دی ہے جو دو پہیہ گاڑی نہیں چلا سکتی ہے، یہ فیصلہ جسٹس دنیش کمار سنگھ کے بنچ نے سنایا۔