شرجیل امام کی گرفتاری سے متعلق وزیر اعلی نتیش کمار نے بڑا بیان دیا ہے، انہوں نے کہا ہے کہ 'ٹکڑے ٹکڑے گینگ' اب ختم ہو جائے گا۔ انہوں نے پولیس کو گرفتاری پر مبارکباد بھی دی۔ واضح رہے کہ شرجیل امام کو جہان آباد کے تھانہ کاکو کے علاقے سے گرفتار کیا گیا ہے۔اتوار کے روز ، پولیس نے بہار کے ضلع جہان آباد میں اس کے آبائی گھر پر چھاپہ ماری کی تھی۔
شرجیل امام کی والدہ نے کہا ہے کہ میرے بیٹے کو پھنسایا جا رہا ہے۔ وہ محض این آر سی کی مخالفت کر رہا تھا۔ شرجیل کی والدہ پروین نے کہا کہ ان کے بیٹے سے ابھی کوئی بات چیت نہیں ہو پا رہی ہے لیکن وہ کوئی چور نہیں ہے، وہ جلد ہی سامنے آئیگا۔
شرجیل کے چاچا ارشد نے کہا کہ اس نے اپنی بات رکھی ہے، جمہوریت میں سب کو اپنی بات رکھنے کی آزادی ہے۔ جو لوگ اسے ملک کا غدار کہہ رہے ہیں انہیں اس کی مکمل تقریر سننی چاہئے۔وہ تو تحریک کی حکمت عملی پر بات کر رہا تھا۔