مودی حکومت کی غلط پالیسیوں کی وجہ سے ملک بدحال: لالو

آر جے ڈی صدر لالو پرساد یادو نے مرکزی حکومت کو شدید تنقید کا نشانہ بناتے ہوئے کہا کہ ’’نریندر مودی حکومت نے غلط پالیسیوں کی وجہ سے ملک کو ہزاروں سال پیچھے دھکیل دیا ہے۔‘‘

چارہ گھوٹالہ میں ضمانت پر رہا ہونے کے بعد راشٹریہ جنتا دل ( آر جے ڈی) صدر لالو پرساد یادو نے پیر کو اپنے پہلے سیاسی خطاب میں مرکز میں برسر اقتدار نریندر مودی حکومت پر جم کر نشانہ لگایا اور کہا کہ اس کی غلط پالیسیوں اور کورونا وبا سے صحیح طریقے سے نہ نمٹنے کی وجہ سے ملک ہزاروں سال پیچھے چلا گیا ہے۔

یادو نے پیر کو پٹنہ میں آر جے ڈی کے ریاستی ہیڈکوارٹر میں منعقدہ پارٹی کے 25 ویں یوم تاسیس تقریب کو نئی دہلی سے ورچوئل طریقے سے خطاب کرتے ہوئے کہا کہ ’’نریندر مودی حکومت نے اپنی غلط پالیسیوں کی وجہ سے ملک کو ہزاروں سال پیچھے دھکیل دیا ہے۔‘‘

انہوں نے کہا کہ ’’یہ بس اشیا پر سروس ٹیکس (جی ایس ٹی) لاگو کرنے اور نوٹ بندی سے شروع ہوا، جو ابھی بھی جاری ہے۔ اس کی وجہ سے ملک ابھی بے حد خراب حالت میں پہنچ گیا ہے۔‘‘

آرجے ڈی صدر نے کہا کہ نریندر مودی نے سال 2014 کے لوک سبھا انتخاب میں تشہیر کے دوران وعدہ کیا تھا کہ ’’ملک کو بکنے نہیں دوں گا‘‘ لیکن ’’آج ریلوے اور دیگر عوامی اداروں کو اونے پونے داموں پر فروخت کیا جارہا ہے جبکہ سبھی جانتے ہیں کہ ریل گاڑی کا استعمال عام لوگ کرتے ہیں۔‘‘

انہوں نے کہا کہ انتخابی تشہیر کے دوران 10 کروڑ نوجوانوں کو روزگار دینے کا وعدہ کیا تھا لیکن وہ بھی وعدہ پورا نہیں ہوا۔