محکمہ موسمیات نے کیا الرٹ، ارریہ میں موسلادھار بارش

بارش کے پیش نظر محکمہ موسمیات نے الرٹ جاری کرتے ہوئے کہا تھا کہ شمالی بہار میں جمعرات اور جمعہ کو موسلادھار بارش ہو سکتی ہے، محکمہ موسمیات کے مطابق ان دو دنوں میں سیمانچل کے ارریہ اور کشن گنج ضلع کو ریڈ زون میں رکھا گیا ہے۔

بارش کے پیش نظر محکمہ موسمیات نے الرٹ جاری کرتے ہوئے کہا تھا کہ شمالی بہار میں جمعرات اور جمعہ کو موسلادھار بارش ہو سکتی ہے، محکمہ موسمیات کے مطابق ان دو دنوں میں سیمانچل کے ارریہ اور کشن گنج ضلع کو ریڈ زون میں رکھا گیا ہے جبکہ مشرقی و مغربی چمپارن، گوپال گنج، سیوان، سارن، مدھوبنی، مظفرپور، دربھنگہ، ویشالی، شیوہر، سمستی پور، سپول، پورنیہ، سہرسہ اور مدھے پورا کو اوریج زون میں رکھا گیا ہے۔ ریڈ زون کا مطلب ان علاقوں میں بھاری بارش ہو سکتی ہے، جس کا اثر یومیہ زندگی پر پڑے گا۔

محکمہ موسمیات کے پیشن گوئی کے مطابق آج ارریہ میں صبح سے لگاتار موسلادھار بارش ہو رہی ہے۔ آج صبح چھ بجے سے آسمان میں کالے بادل چھانے لگے، ساتھ ہی تیز ہوا بھی بہنے لگی، پھر کچھ دیر بعد ہی بارش شروع ہو گئی جو تاہنوز جاری ہے۔ موسلادھار ہو رہی بارش سے یومیہ زندگی متاثر ہو گئی ہے۔ لوگ اپنے اپنے گھروں میں قید ہیں۔ اس بارش نے یومیہ مزدوروں کی روزی روٹی کو متاثر کیا ہے۔ بارش کی وجہ سے مزدور طبقہ بھی باہر نہ نکلنے کو مجبور ہیں۔

صبح سے ہو رہی بھاری بارش سے ضلع کے نشیبی علاقوں میں واقع ندی کی سطح میں اچھال دیکھنے کو مل رہا ہے، جوکی ہاٹ، رانی گنج ، بھرگامہ، سکٹی، فاربس گنج علاقے کے پرمان، مہانندہ، کنکئی اور داس ندیوں میں ندی کا کٹان بھی تیز ہو گیا ہے۔ جس سے ندی کے پاس بسنے والے عوام کی پریشانی بڑھ گئی ہے۔

محکمہ موسمیات کی جانب سے جاری کیے گئے الرٹ سے عوام بھی الرٹ ہو گئی ہے۔ لوگ کھانے پینے کے ضروری سامان پہلے سے گھروں میں محفوظ کر چکے ہیں مگر اس بارش سے سب سے زیادہ نقصان ان لوگوں کو اٹھانا پڑ رہا ہے جو ندی کے کنارے آباد ہیں۔

ذرائع کے مطابق جوکی ہاٹ کے بیرگاچھی کے پاس 150 سے 200 گھر ندی کٹان کے زد میں ہے، اگر بر وقت پرمان ندی کے کٹان کو روکا نہیں گیا تو ان متاثرین خاندان کے گھر ندی کے آغوش میں چلے جائیں گے۔