ریاست سمیت ارریہ میں کل سے ہوگا میٹرک امتحان کا آغاز

بہار اسکول اگزامینشن بورڈ کے ذریعہ ریاست بھر کے تمام اضلاع میں کل سے میٹرک 2021 کا امتحان شروع ہو رہا ہے، جس کے لیے تیاری مکمل کر لی گئی ہے۔ یہ امتحان 17 فروری سے شروع ہو کر 24 فروری تک چلے گا۔ امتحان دو نشستوں میں منعقد ہوگا۔

آج ضلع کلکٹر پرشانت کمار کی صدارت میں کلکٹریٹ احاطہ کے سبھا بھون میں ایک اہم نشست منعقد ہوئی جس میں ارریہ میں میٹرک امتحان کی تیاری کو لیکر ضلع کلکٹر نے صحافیوں کو معلومات فراہم کی۔

پرشانت کمار نے کہا کہ ہم لوگ پوری طرح تیار ہیں۔ ہم لوگوں کی ترجیحات ہے کہ امتحان کسی بھی طرح سے بدعنوانی سے پاک ہو، اس کے لیے ضلع ایجوکیشن آفیسر و دیگر متعلقہ آفیسر کے ساتھ میٹنگ ہوئی ہے اور انہیں کئی ضروری ہدایتیں دی گئی ہیں۔ اس بار ارریہ ضلع میں کل 19 امتحان مراکز بنائے گئے ہیں جبکہ الگ سے چار ماڈل امتحان سینٹر بنائے گئے ہیں۔ اس سینٹر پر امتحان دہندگان صرف طالبہ ہی ہوں گی۔ یہی نہیں یہاں نگرانی سے لیکر مجسٹریٹ تک خاتون کو ہی رکھا گیا ہے۔ اس بار طلباء جوتا پہن کر امتحان دے سکیں گے۔

پرشانت کمار نے کہا کہ ارریہ میں کل 8423 طلباء اس امتحان میں شریک ہو رہے ہیں۔ ہر سینٹر پر امتحان گاہ میں داخل ہونے سے قبل امتحان دہندگان کو جانچ سے گزرنا ہوگا۔ بغیر جانچ ہوئے طلباء امتحان گاہ میں نہیں بیٹھ سکیں گے۔ امتحان گاہ میں کسی طرح کے الیکٹرانک سامان لانے پر مکمل پابندی ہوگی۔ پکڑے جانے پر امتحان گاہ سے خارج بھی کیا جا سکتا ہے۔ اس موقع پر ضلع ایجوکیشن آفیسر بالیشور کمار نے بھی کل سے شروع ہو رہے امتحان کی پوری تیاری کر لینے کی بات کہی.