'آئین کے تحفظ کو یقینی بنانا اولین ترجیح'

سنویدھان بچاؤ مورچہ کے چیئر مین مولانا انیس الرحمن قاسمی نے تمام اداروں سے یوم جمہوریہ پر آئین کی تحفظ کے لیے عہد کرنے کی اپیل کی۔

انہوں نے 26 جنوری یوم جمہوریہ کی تقریب میں دستور وآئین کی حفاظت کے لیے عہد کرنے کی اپیل کی، انہوں نے کہا کہ' سبھی اداروں کو چاہیے کہ وہ اس موقعے پر آئین کے دباچے کو پڑھ کر عہد لیں کہ وہ آئین کے خلاف کسی بھی قوانین کو قبول نہیں کریں گے'۔

انہوں نے ایک اخباری بیان میں کہاکہ' مذہب کی بنیاد پر بنائے گئے شہریت ترمیمی ایکٹ2019 (سی اے اے)،این آرسی اوراین پی آرکے خلاف پورے ملک میں مظاہرے،دھرنے اوربھوک ہڑتال جاری ہے۔ اس متنازع قانون کے خلاف احتجاج کو جاری رکھا جائے اور26جنوری یوم جمہوریہ پر دستور کی تمہیدتمام اسکولوں، مدرسوں اورسماجی وتعلیمی اداروں میں پڑھ کر اقرار کریں کہ ہم اس دستور کی حفاظت کریں گے اوردستور کے خلاف کسی بھی قانون کو نہیں مانیں گے، چاہے وہ موجودہ سی اے اے ہو،یا کوئی دوسرا قانون۔

تمہیدکے الفاظ یہ ہیں'ہم بھارت کے عوام متانت وسنجیدگی سے عزم کرتے ہیں کہ بھارت کو ایک مقتدر سماج وادی غیر مذہبی عوامی جمہوریہ بنائیں اوراس کے تمام شہریوں کے لیے حاصل کریں۔ انصاف،سماجی،معاشی اورسیاسی،آزادی خیال،اظہار،عقیدہ،دین اورعبادت،مساوات بہ اعتبار حیثیت اورموقع، اوران سب میں اخوت کو ترقی دیں، جس سے فرد کی عظمت اورقوم کے اتحاد اور سالمیت کاتیقن ہو'۔

مولانا نے مزید کہاکہ' جہاں جہاں پورے ملک میں سی اے اے اوراین آر سی واین پی آر کے خلاف دھرنے ہورہے ہیں،وہاں اس تمہید کو پڑھ کواس کی حفاظت کو عہد کریں۔