بہار میں آسمانی بجلی کی زد میں آنے سے دو افراد ہلاک، دو زخمی

بہار کے دو مختلف اضلاع میں آسمانی بجلی کی زد میں آنے سے دو کی موت ہوگئی جبکہ دو افراد زخمی ہو گئے ہیں۔

بہار کے مشرقی چمپارن ضلع کے کنڈوا چین پور تھانہ علاقے کے چاند موہن گاؤں میں جمعہ کو آسمانی بجلی گرنے سے ایک شخص کی موت واقع ہوگئی اور دو دیگر زخمی ہو گئے۔

پولیس ذرائع نے بتایاکہ چاند موہن گاؤں میں بسنت چوک کے نزدیک تیز بارش کے ساتھ آسمانی بجلی کی زد میں آنے سے ایک شخص کی موت ہوگئی جبکہ دو دیگر جھلس کر زخمی ہوگئے۔

ذرائع نے مزید بتایاکہ متوفی کی شناخت 55سالہ پرویز عالم کے طور پر کی گئی ہے۔ زخمیوں کو علاج کیلئے ڈھاکہ ریفرل اسپتال میں داخل کرایا گیا ہے جبکہ لاش پوسٹ مارٹم کیلئے بھیج دی گئی ہے۔

وہیں نوادہ ضلع کے روپو پولیس آؤٹ پوسٹ کے اینی ڈیہہ گاؤں میں آسمانی بجلی گرنے سے ایک دیہی باشندے کی موت ہوگئی ہے۔

پولیس ذرائع نے بتایاکہ اینی ڈیہہ گاؤں کے باشندہ 56سالہ سوریش یادو مویشی چرا رہا تھا تبھی آسمانی بجلی گرنے سے اس کی موت ہوگئی۔ متوفی کی لاش پوسٹ مارٹم کیلئے بھیج دی گئی ہے۔