بائیں محاذ کی انسانی زنجیر میں شرکت کی اپیل

امارت شرعیہ نے 25 جنوری کو سی اے اے، این آرسی ، این پی آر کے خلاف انسانی زنجیر میں لوگوں سے شرکت کی اپیل کی ہے۔

اس سلسلے میں آج امارت شرعیہ میں منعقد کل جماعتی میٹنگ میں شریک 34 سیاسی و غیر سیاسی جماعتوں نے بیک آواز بائیں بازو کی پارٹیوں کی جانب سے سی اے اے، این آر سی اور این پی آر کے خلاف 25 جنوری کو بننے والی انسانی زنجیر میں شریک ہونے کی اپیل کی۔

امارت شرعیہ کے قائم مقام ناظم مولانا محمد شبلی القاسمی نے اپنے ایک بیان میں امارت شرعیہ کے انسانی زنجیر کی حمایت کرنے کی اطلاع دیتے کہا کہ' 22 جنوری کو امیر شریعت حضر ت مولانا محمد ولی رحمانی کی قیادت میں بہار کی چھوٹی بڑی چونتیس سیاسی و غیر سیاسی پارٹیوں کے رہنما جمع ہوئے اور انہوں نے متفقہ طور پر سی اے اے ، این آر سی اور این پی آر کے مکمل بائیکاٹ کا اعلان کیا۔ میٹنگ میں شریک سبھی جماعتوں نے مل کر 25جنوری کو لیفٹ پارٹیوں کی طرف سے بننے والی انسانی زنجیرمیں شریک ہونے اور29 جنوری کو ہونے والے بھارت بند کی حمایت کا اعلان کیا ہے۔

انہوں نے کہا کہ' امارت شرعیہ پوری طرح پر اس انسانی زنجیر میں شریک ہوگی، اور امارت شرعیہ میں اس کی تیاری شروع ہو چکی ہے، تمام قضاة، نقباء، نائبین نقباء، ارکان شوریٰ و عاملہ ، ارباب حل و عقد ،ضلع اور بلاک سطح کے ذمہ داروں، ائمہ کرام اور سیاسی و سماجی کارکنان کو انسانی زنجیر میں شریک ہونے کی دعوت دی جارہی ہے۔

انہوں نے مزید کہا کہ' سی اے اے ، این پی آر اور این آر سی کی مخالفت ہر بھارتی کو آئین کے دائرے میں رہتے ہوئے ضرور کرنا چاہئے اور ملک و دستور کی حفاظت کے لیے ہر قربانی دینے کو تیار رہنا چاہئے، اس لیے ہمارا فرض ہے کہ اس مہم کوکامیاب بنانے کے لیے ابھی سے سرگرم رول اداکریں، لوگوں سے اس مہم میں شریک ہونے کی درخواست کریں ،ائمہ کرام سے بھی درخواست ہے کہ جمعہ میں اس کا اعلان کردیں۔