دہلی تشدد کے لیے وزیر داخلہ ذمہ دار: تیجسوی یادو

ریاست بہار کے سابق وزیر اعلی اور آر جے ڈی رہنما تیجسوی یادو نے دہلی تشدد پر تبصرہ کرتے ہوئے کہا کہ 'تشدد کے لیے وزیر داخلہ ذمہ دار ہے۔'

تیجسوی یادو نے کہا کہ 'بی جے پی کے جو رہنما تشدد بھڑکانے کے ذمہ دار ہیں۔ حکومت انہیں حفاظت کیوں مہیا کرا رہی ہے۔ کپل مشرا جیسے رہنما ملک کو توڑنا چاہ رہے ہیں۔ انہیں زیڈ کیٹگری سکیورٹی کیوں مہیا کرائی جارہی ہے؟۔'

انہوں نے کہا کہ 'ہم لوگ نہیں چاہتے کہ تشدد ہو بلکہ امن و امان کی فضا قائم رہے لیکن دہلی تشدد کے لیے حکومت نے کیا قدم اٹھایا۔ سارے لوگ جانتے ہیں کہ کیا ہوا کس کے بھڑکانے کی وجہ سے تشدد برپا ہوا۔ کس پارٹی سے ان کا تعلق ہے۔ دہلی پولیس کا اختیار کس کے پاس ہے'۔

انہوں نے کہا کہ' اگر کوئی متاثرین سے ملنے جا رہا ہے تو اس پر اعتراض کیوں ہے۔ فساد متاثرین کا کوئی تو سہارا بننے گیا۔ لیکن حکومت میں بیٹھے لوگ ٹرمپ کا استقبال کرتے رہ گئے فساد متاثرین سے ملنے نہیں گئے۔ ان کو بھی جواب دینا چاہیے کہ آخر فساد روکنے کے لیے کیا انتظام کیا۔'

تیجسوی یادو نے کہا کہ شاہین باغ کا وفد ان سے ملنے جاتا ہے تو یہ ملتے نہیں۔ انہوں نے سوالیہ انداز میں کہا کہ کیوں نہیں ملتے کیا وہ اس ملک کے شہری نہیں ہیں۔ حکومت کا کیا کام ہے حکومت تو عوام کے لیے ہوتی ہے'۔