مرکزی حج کمیٹی کے ذریعہ جاری سرکولر سے عازمین کا حج 2020 سے محروم ہونے کا امکان پیدا ہو گیا ہے۔ بہار سے اس برس تقریباً 5 ہزار عازمین فریضہ حج ادا کرنے بیت اللہ تشریف لے جانے والے تھے لیکن کورونا وبا اور لاک ڈاون کی وجہ سے یہ سفر ملتوی ہوتا ہوا دکھائی دے رہا ہے۔ سعودی حکومت نے اب تک اس سے متعلق کوئی احکام جاری نہیں کیا ہے۔ اس سفر کے ملتوی ہونے کے امکان کی وجہ سے عازمین حج غمگین ہیں۔
حج سے محروم ہو نے کے امکان سے عازمین کی آنکھیں نم بہار ریاستی حج کمیٹی کے افسران اور چیئرمین سے ملاقات نہیں ہوسکی۔ آج دفتر میں یہ لوگ موجود نہیں تھے لیکن پٹنہ کے کچھ عازمین حج نے ای ٹی وی بھارت سے خصوصی ملاقات میں سفر حج پر نہیں جانے کے امکان کا درد ظاہر کرتے ہوئے مایوسی کا اظہار کیا ہے۔ پٹنہ کے معید عالم جو اپنی اہلیہ کے ہمراہ حج بیت اللہ کو جانے والے ہیں، انہوں نے کہا کہ ایسی حالت میں بہت افسوس ہو رہا ہے۔ اس دوران انکی آنکھیں نم ہوگئی اور انہوں نے کہا کہ کئی برسوں سے تیاری کر رہے تھے، بہت تکلیف ہے، پتہ نہیں آئندہ برس کون رہے گا۔ انہوں نے کہا کہ یہ مقدس سفر کورونا وبا اور لاک ڈاون کی نذر ہوتا دکھائی دے رہا ہے۔ محمود الرحمٰن نے غمگین لہجے میں کہا کہ بڑی تمنا تھی، ملازمت سے سبکدوشی کے بعد میں اور اہلیہ نے سفر حج پر جانے کا ارادہ کیا تھا. لیکن اس کورونا وبا کی وجہ سے ہمت جواب دے رہی ہے۔ ایک خوف سا ہے، بات کرتے وقت وہ بھی غمگین تھے۔ انہوں نے بھرے دل سے کہا کہ ہم نے سفر حج ملتوی کر دیا ہے۔
