محکمہ زراعت سے موصول اطلاعات کے مطابق کھیتوں میں فصلوں کی پرالی جلانے پر ضلع کے دس کسانوں کے خلاف ایف آئی آر درج کیا گیا ہے، اس کے علاوہ 300 کسانوں کی رجسٹریشن کو لاک کرنے کی بھی کارروائی کی گئی ہے۔
اس سلسلے میں ڈی اے او للیتا پرساد نے بتایا کہ کھیتوں میں پرالی کو نہ جلانے کے لیے محکمہ کی جانب سے کسانوں کو پہلے ہی آگاہ کیا جا چکا تھا اور اس سلسلے میں مہم بھی چلا کر اس سے ہونے والے نقصانات کے بارے میں بتایا جا رہا ہے۔
عہدیداروں کے ذریعہ ایک ٹیم تشکیل دی جارہی ہے اور کسانوں کو آگاہ کرنے کے لیے دیہاتوں میں بھیجا جارہا ہے، اس کے باوجود کچھ کسان کھیتوں میں پرالی کو جلا رہے ہیں، موصول اطلاعات کے مطابق دس کسانوں کی شناخت کی جا چکی ہے۔
انہوں نے بتایا کہ بھبوا تھانہ میں چھ کسانوں کے خلاف ایف آئی آر درج کی گئی ہے، کدرہ میں دو، موہنیاں اور نوآؤں میں ایک ایک، ڈی اے او نے بتایا کہ مذکورہ کاشتکاروں کو تین برسوں سے محکمہ زراعت کے زیر انتظام چلائی جانے والی اسکیموں کا فائدہ نہیں ملے گا۔