ریاست کے سبھی ہسپتالوں سے تجاوزات ہٹائے جائیں: ہائی کورٹ

پٹنہ ہائی کورٹ نے ریاست کے سبھی سرکاری ہسپتالوں سے غاصبانہ قبضہ ہٹانے کی ہدایت حکومت کو دیتے ہوئے کہا ہے کہ ان تمام سرکاری ہسپتالوں کی نشاندہی کر ان کی حصار بندی کرائی جائے۔

پٹنہ ہائی کورٹ کے چیف جسٹس سنجے کرول کی بنچ نے وکاس چندر عرف گڈو بابا کے ذریعے دائر مفاد عامہ کی عرضی پر سماعت کرتے ہوئے مذکورہ ہدایت کے ساتھ یہ بھی کہا کہ ریاستی حکومت کو فوری طور پر غاصبانہ قبضہ کو ہٹا کر اگلی سماعت میں کاروائی کی تفصیل پیش کرے۔

واضح ہو کہ ریاست کے ضلع اسپتال سمیت دوسرے زیادہ تر سرکاری ہسپتالوں میں غاصبانہ قبضہ ہوا ہے ریاستی حکومت و ضلع انتظامیہ کے ذریعہ ٹھوس اقدامات نہیں کیے جانے کی وجہ سے یہ غاصبانہ قبضہ لگاتار بڑھتا جا رہا ہے۔ اس کے ساتھ ہی ریاست کے سرکاری میڈیکل کالج اور پٹنہ کے ویٹرینری کالج میں بھی بڑے پیمانے پر قبضہ ہے۔ اس معاملے پر دو ہفتے کے بعد دوبارہ سماعت کی جائے گی۔