چراغ کے ذہن میں آخر چل کیا رہا ہے؟

چراغ پاسوان نے کہا کہ اگر مجھے آسان راستہ منتخب کرنا ہوتا تو میں اس اتحاد میں شامل ہو جاتا، لیکن میں نے بہار کو اس کا حق دلانے کے لیے ایک مشکل راستے کا انتخاب کیا ہے۔ میں ریاست کی کھوئی ہوئی عظمت کو واپس لاؤں گا۔ ایک طرف وہ وزیراعظم مودی کی تعریف کر رہے ہیں، بی جے پی کی حمایت بھی کر رہے ہیں اور آگے بھی حمایت جاری رکھنے کی وکالت کر رہے ہیں تو دوسری طرف وزیراعلی نتیش کمار پر طنز بھی کر رہے ہیں مزید یہ کہ آر جے ڈی رہنما تیجسوی یادو کو مبارکباد بھی دے رہے ہیں۔

بہار میں اب قومی جمہوری اتحاد (این ڈی اے) میں بھی دراڑ پڑ گئی ہے اور لوک جن شکتی پارٹی (ایل جے پی) نے وزیر اعلی نتیش کمار کی قیادت میں انتخابات نہ لڑنے کا فیصلہ کیا ہے۔ اسی درمیان ایل جے پی کے قومی صدر چراغ پاسوان نے کہا ہے کہ بہار میں اگلی حکومت بی جے پی کی قیادت میں بنے گی، جس میں ایل جے پی بھی شامل ہوگی اور پارٹی کے تمام اراکین اسمبلی وزیر اعظم نریندر مودی کی سربراہی میں کام کریں گے۔

'تیجسوی یادو کو مبارک باد'

تیجسوی یادو کے وزیراعلیٰ امیدوار ہونے کے سوال پر چراغ پاسوان نے کہا کہ وہ میرے چھوٹے بھائی ہیں۔ میں ان کے لیے نیک خواہشات پیش کرتا ہوں۔ عوام کے سامنے جتنے آپشنز ہوں گے ریاست کے لیے اتنا ہی بہتر ہوگا۔ چراغ نے کہا کہ بہار کے لوگوں کو اس کا فیصلہ کرنا ہے کہ کون بہار کی بہتر ترقی کے لیے بہتر کردار ادا کرسکتا ہے اور کس کے ہاتھ میں ان کے بچوں کا مستقبل محفوظ رہے گا۔

لوک جن شکتی پارٹی (ایل جے پی) کے سربراہ چراغ پاسوان نے کہا ہے، 'مجھے وزیر اعظم نریندر مودی پر پورا اعتماد ہے۔ پی ایم مودی نے بہار کی ترقی کے لیے ڈبل انجن حکومت چلانے کے بارے میں بھی بات کی تھی، لیکن افسوس کہ ان کی بات چیت اور پروگراموں پر عمل درآمد نہیں ہوسکا۔ وزیر اعظم مودی کی اسکیموں کو صحیح طریقے سے زمین پر نہیں اتارا جا سکا۔

چراغ کا نتیش پر حملہ

اس موقعے پر چراغ پاسوان نے نتیش کمار پر حملہ کرتے ہوئے کہا کہ بہار کے وزیر اعلی سے بہت زیادہ توقعات وابستہ ہیں، لیکن وہ ان توقعات کو پورا نہیں کرسکے۔

چراغ نے مزید کہا کہ اگر مجھے آسان راستے کا انتخاب کرنا ہوتا تو میں 'اتحاد' میں شامل ہوجاتا، لیکن میں نے بہار کو اس کا حق دلانے کے لیے ایک مشکل راستے کا انتخاب کیا ہے۔ میں ریاست کی کھوئی ہوئی عظمت کو واپس لاؤں گا۔