نتیش حکومت کی کابینہ میں توسیع کے ساتھ قلمدانوں کی بھی تقسیم

ریاست بہار کی نتیش حکومت کی کابینہ توسیع میں بھارتیہ جنتا پارٹی کے نو، جنتا دل یونائٹیڈ کے سات اور آزاد رکن اسمبلی کو جگہ دئے جانے کے ساتھ ہی آج وزراء کے مابین قلمدانوں کی بھی تقسیم کر دی گئی۔

گورنر ہاﺅس میں منعقد حلف برداری تقریب میں گورنر پھاگو چوہان نے سب سے پہلے بھارتیہ جنتا پارٹی کے سید شاہنواز حسین کو زارعتی عہدہ اور رازداری کا حلف دلایا، شاہنواز حسین نے یہ حلف اردو میں لیا، اس کے بعد جنتادل یونائٹیڈ کے شرون کمار نے وزارتی عہدہ کا حلف لیا۔

ان دونوں لیڈران کے بعد مدن سہنی ( جے ڈی یو ) ، پرمود کمار ( بی جے پی ) ، سنجے کمار جھا ( جے ڈی یو) ، لیسی سنگھ ( جے ڈی یو ) ، سمراٹ چودھری ،نیرج کمار سنگھ ببلو، سبھاش سنگھ ، نتن نوین ( سبھی بی جے پی )، سمت کمار سنگھ ( آزاد ) ، سنیل کمار ( جے ڈی یو ) ، نارائن پرساد ( بی جے پی )، جینت راج ( جے ڈی یو ) ، آلوک رنجن ( بی جے پی) ، محمد زماں خان ( جے ڈی یو ) ، جنک رام ( بی جے پی ) نے وزارتی عہدہ اور رازداری کا حلف لیا، سنجے جھا اور آلوک رنجن نے میتھلی زبان میں حلف لیا۔

سید شاہنواز حسین کو صنعت، شرون کمار کو دیہی ترقیات، مدن سہنی کو سماجی فلاح، پرمود کمار کو گنا صنعت اور قانون، سنجے کمار جھا کو آبی وسائل اور اطلاعات و رابطہ عامہ محکمہ، لیسی سنگھ کو خوراک اور صارفین تحفظ اور سمراٹ چودھری کو پنچایتی راج محکمہ کی ذمہ داری دی گئی ہے ۔

(یو این آئی)