بہار: سنجے جیسوال کورونا مثبت

بی جے پی ریاستی صدر ڈاکٹر سنجے جیسوال کورونا مثبت پائے گئے ہیں۔ سنجے جیسوال کی اہلیہ منجو چودھری اور والدہ بھی کورونا سے متاثر ہیں۔ اس سے قبل، بہار بی جے پی کے بہت سے رہنماؤں کی رپورٹ مثبت آئی تھی۔

سنجے جیسوال اپنے آبائی علاقے بتیا میں ہوم قرنطینہ میں ہیں۔ کورونا سے متاثر ہونے سے قبل انہوں نے جس سے بھی ملاقات کی تھی وہ تمام مشتبہ مانے جا رہے ہیں۔ جیسوال کے سیکیورٹی اہلکار اور دوسرے افراد بھی کورونا کی زد میں آسکتے ہیں۔ اگرچہ بتیا کے ضلعی مجسٹریٹ نے ای ٹی وی بھارت سے گفتگو کرتے ہوئے کہا ہے کہ ابھی تک انہیں اس تعلق سے کوئی اطلاع نہیں ملی ہے۔ اگر سنجے جیسوال کورونا متاثر ہیں تو احتیاطی تحفظ کے لیے جو بھی اقدامات اٹھانے کی ضرورت ہے، اٹھائے جائیں گے۔

واضح رہے کہ بہار بی جے پی میں کورونا وائرس کا انفیکشن مسلسل بڑھتا جارہا ہے۔ بہار بی جے پی میں اس سے قبل پیر کے روز 80 رہنماؤں کا نمونہ لیا گیا تھا۔ جن میں 30 سے ​​زیادہ رہنما کورونا مثبت پائے گئے تھے۔ بہار میں اتنے بڑی تعداد میں سیاست دانوں کے کورونا مثبت ہونے کے بعد لوگ کافی خوفزدہ ہیں۔ بہت سارے سرکاری محکمے بھی اس مرض کا شکار ہیں، جس کی وجہ سے تمام سیاسی اور غیر سیاسی لوگوں کی تشویش بڑھ گئی ہے۔