ریاست بہار میں ضلع کیمور کے بھبھوا پولیس لائنز میں ایک خاتون پولیس اہلکار نے خود کشی کرکے اپنی زندگی کا خاتمہ کر دیا۔ لواحقین نے خودکشی کو جہیز کا مطالبہ اور گھریلو تنازعہ قرار دیا۔
ریبھا کماری نامی مہلوک خاتون پولیس اہلکار کا شوہر سی آر پی ایف اہلکار ہے اور اس وقت اڑیسہ میں تعینات ہے۔
ضلع بکسر کے گاندھی پور گاؤں کی رہائشی ریبھا کماری سنہ2015 میں پولیس میں بھرتی ہوئی اور 2018میں ان کی شادی ہوئی تھی اور وہ ڈیڑھ سالہ بچے کی ماں تھی۔
واقعے کی اطلاع ملنے پر متوفی کے والد سمیت اہل خانہ بھبھوا پہنچے۔
ریبھا کماری کے والد نے بتایا کہ شادی کے بعد سے ہی اسے شوہر کے ذریعہ جہیز کے لئے ہراساں کیا جاتا رہا۔ انہوں نے کہا: ’’اس سے قبل بھی ٹیلیفون پر اس کا شوہر (جہیز کے لیے) تنگ کیا کرتا تھا اور بالآخر وہ خودکشی کرنے پر مجبور ہو گئیں۔‘‘
واقعے کے بعد پولیس سپرانٹنڈنٹ دلنواز احمد بھی موقع پر پہنچے، انہوں نے معاملے کو سنجیدگی سے لیتے ہوئے ایف آئی آر درج کرانے کے ساتھ ہی تحقیقات کا بھی حکم دیا۔
قانونی و طبی لوازمات کے بعد لاش کو آخری رسومات کے لیے اہل خانہ کے سپرد کیا گیا۔