'قرنطینہ میں رکھے گئے تمام لوگوں کی روزانہ جانچ کا حکم'

ریاست بہار کے ضلع کیمور میں ڈی ایم نے ڈاکٹروں کو حکم دیا ہے کہ لاک ڈاؤن کے درمیان بیرون ریاست سے آنے والے مزدوروں و دیگر افراد جنہیں پنچایت کے قرنطین میں رکھاگیا ہے ان کی روزانہ جانچ کی جائے۔

بہار کے ضلع کیمورمیں ڈی ایم نے ڈاکٹروں کو حکم دیتے ہوئے کہا ہے کہ قرنطینہ میں رکھے گئے تمام افراد کی صحت پر گہری نظر رکھی جائے اور یومیہ کی بنیاد پر ان کا چیک اپ کیا جائے۔

ڈٰی ایم کا مزید کہنا تھا کہ اگر کسی شخص میں کورونا کی علامات پائی جاتی ہیں تو فوری طور پر اس سلسلے میں میڈیکل انچارج آفیسر کو آگاہ کیا جائے۔

ضلع مجسٹریٹ نے زور دے کر کہا ہے کہ غیر ممالک و بیرون ریاست سے آنے والے تمام افراد کا میڈیکل ٹیم کی نگرانی میں معائنہ کیا جائے گا اور 15 روزتک ان تمام افراد کی صحت کی باقاعد گی سے نگرانی کی جائے گی، اس میں کسی قسم کی لاپروائی اور نرمی قبول نہیں کی جائے گی۔

ضلع کے آفس سیل میں منعقدہ ایک اجلاس میں لاک ڈاون اور کورونا وائرس جیسے سنجیدہ حالات پر تبادلہ خیال کیا گیا، اس دوران علاقے کے دیگر عہدیدار بھی اجلاس میں شامل رہے۔

انہوں نے بتایا کہ مقامی کمشنر بہار بھون ریاست سے باہر پھنسے ہوئے لوگوں کو ہر ممکن مدد فراہم کررہے ہیں، انہوں نے دہلی میں واقع بہار کے ہیلپ لائن نمبر کا ذکر کرتے ہوئے کہا کہ ،7070290170 ،9773711261، ان نمبروں پر رابطہ کرکے ریاست کے باہر پھنسے لوگوں کے بارے میں بھی معلومات دی جاسکتی ہیں، بہار بھون کی جانب سے ان کی ہر ممکن مدد کی جائے گی۔