کب تک لوگ سیلاب سے متاثر ہوتے رہیں گے؟

بہار کانگریس کے ریاستی صدر ڈاکٹر مدن موہن جھا اور بہار کانگریس کے انچارج و قومی سکریٹری وریندر سنگھ راٹھور کی ہدایت پر ارریہ میں سیلاب متاثرین کی امداد کے لیے ایک اہم نشست چاندنی چوک واقع پارٹی دفتر میں ہوئی۔

نشست کی صدارت کانگریس کے ارریہ ضلع صدر انل کمار سنہا نے کی جبکہ آبزرور کی حیثیت سے پٹنہ سے تشریف لائی بہار کانگریس کی سینیئر خاتون لیڈر انوکھا دیوی شریک ہوئی۔

نشست سے خطاب کرتے ہوئے آبزرور انوکھا دیوی نے کہا کہ اس وقت بہار قدرتی آفت کی زد میں ہے، سیلاب سے پورا بہار خصوصاً سیمانچل کے بیشتر اضلاع متاثر ہوئے ہیں، یہ سیلاب 2017 کی یاد دلاتا ہے، گرچہ پانی نہ ہونے سے کچھ راحت ہے مگر ابھی برسات کا موسم باقی ہے۔ اس لیے ضلع انتظامیہ کے ساتھ یہاں کے عوام کو بھی بیدار رہنا ہوگا۔

انہوں نے کہا کہ ریاستی حکومت جب جانتی ہے کہ سیمانچل ہر برس سیلاب کی مار جھیلتا ہے تو قبل از وقت کیوں تیاری نہیں کی جاتی؟ یہ انتظامیہ کی سست روی کا نتیجہ ہے کہ اس پیمانے پر راحت کا کام نہیں ہو سکا جتنی ضرورت تھی۔

ضلع صدر انل کمار سنہا نے کہا کہ حکومت اپنی ذمے داری میں ناکام ہو چکی ہے، ارریہ میں درجنوں لوگوں کے مکان اس سیلاب میں ڈوب گئے ہیں اور لوگوں کی جان و مال کا بھی نقصان ہوا ہے۔

انہوں نے ریاستی حکومت سے سوال کیا کہ آخر سیمانچل کے عوام کب تک سیلاب سے متاثر ہوتا رہے گا، اس کے مستقل حل کے لیے کوئی ٹھوس قدم اٹھانے کی ضرورت ہے۔

نشست میں یہ بھی فیصلہ ہوا کہ ایک کمیٹی تشکیل دے کر ضلع کے تمام بلاک کا سروے کیا جائے گا اور پھر جو علاقے زیادہ سیلاب سے متاثر ہوں گے، وہاں امدادی کاروائی کی جائے گی۔