بہار: کورونا سے 16 افراد ہلاک، متاثرین کی تعداد 3 ہزار سے تجاوز

بہار میں مریضوں کی تعداد میں اضافے کی رفتار کا اندازہ اس حقیقت سے لگایا جاسکتا ہے کہ 8 دن کے اندر متاثرہ افراد کی تعداد میں دگنا سے زیادہ اضافہ ہوا ہے۔

ریاست بہار میں کورونا وائرس کی وجہ سے 16 ویں موت ہوگئی ہے۔ یہاں کورونا متاثرین کی تعداد 3 ہزار 185 ہوگئی ہے۔ علاج و معالجے کے بعد صحتیاب ہونے والوں کی تعداد بھی کافی اچھی ہے۔ جمعرات تک متاثرہ افراد میں سے 1 ہزار 50 افراد علاج کے بعد اپنے گھروں کو لوٹ چکے ہیں۔

بہار میں کورونا وائرس کی وجہ سے مجموعی طور پر 16 افراد لقمہ اجل بن چکے ہیں، ان میں سے پٹنہ، ویشالی اور کھگڑ یا میں سے دو دو، جبکہ منگیر، روہتاس، مشرقی چمپارن، سیتا مڑھی، نالندا ، بیگوسرا ئے، سارن، بھوج پور اور جہان آباد میں ایک ایک کے ہلاک ہونے کی خبر ہے۔

محکمہ صحت کے سکریٹری لوکیش کمار سنگھ نے بتایا کہ بہار میں کورونا مثبت کیس کی تعداد 3 ہزار 185 ہوگئی ہے۔ ابھی تک بہار میں کورونا انفیکشن کی 68 ہزار 262 لوگوں کی جانچ ہوچکی ہیں، کل تفتیش کا 4.4 فیصد کورونا مثبت پایا گیا ہے۔ 3 مئی کے بعد آنے والے مہاجر مزدوروں میں سے 2 ہزار 72 مزدوروں کو کورونا سے متاثر پایا گیا۔