بہار بی جے پی کے نائب صدر ایل جے پی کے امیدوار ہونگے

بہار میں بھارتیہ جنتا پارٹی کے ریاستی نائب صدر اور قدآور رہنما راجندر سنگھ دینارا اسمبلی حلقہ سے لوک جن شکتی پارٹی کے امیدوار کے طور پر انتخاب لڑیں گے۔

ریاست بہار میں بھارتیہ جنتا پارٹی کے ریاستی نائب صدر اور قدآور رہنما راجندر سنگھ نے کہا کہ دینارا حلقہ کے عوام کے دباﺅ میں وہ اس حلقہ سے انتخاب لڑنے جا رہے ہیں۔ علاقہ کے لوگ ان پر انتخاب لڑنے کے لیے پر زور دباﺅ بنائے ہوئے ہیں، لوگوں کے بے پناہ پیار کو وہ درکنار نہیں کر سکتے۔ اس وجہ سے انہوں نے کہا کہ ہر حال میں اس علاقہ سے انتخاب لڑنے کا من بنا لیا ہے، اس سے متعلق ایل جے پی سے بات بھی ہوگئی ہے۔

واضح رہے کہ قومی جمہوری اتحاد (این ڈی اے) میں جنتادل یونائٹیڈ (جے ڈی یو) اور بی جے پی کے مابین سیٹوں کے تقسیم کے تحت دینارا سیٹ جے ڈی یو کے کھاتے میں چلی گئی ہے۔

اس علاقہ سے جے ڈی یو کے موجودہ رکن اسمبلی اور وزیر جے کمار سنگھ کو پھر سے امیدوار بنایا گیا ہے۔ سال 2015 میں بی جے پی جب جے ڈی یو سے الگ ہو کر اسمبلی انتخابی میدان میں اتری تھی تب اس سیٹ سے راجندر سنگھ ہی بی جے پی کے امیدوار تھے اور وہ جے ڈی یو امیدوار اجے کمار سنگھ سے تقریبا 2700 ووٹوں سے شکست کھا گئے تھے۔

راجندر سنگھ سال 1983 میں آر ایس ایس سے منسلک ہوگئے تھے، سال 2004 میں وہ بی جے پی سے جڑے اور انہوں نے وارانسی میں تنظیمی سکریٹری کے فرائض کو انجام دیا، اس کے بعد سال 2013 میں جھارکھنڈ کے ریاستی تنظیمی سکریٹری بنے۔