گوتم بدھ نگر: یوگی حکومت انتخابی وعدے پورے کرنے میں ناکام: عام آدمی پارٹی

عام آدمی پارٹی نے وزیر اعلیٰ یوگی آدتیہ ناتھ کے کل گوتم بدھ نگر کے دادری قصبے کے دورے پر سوالات اٹھائے ہیں۔ عام آدمی پارٹی کے ضلع صدر بھوپیندر جادون نے کہا ہے کہ یوگی حکومت کے اقتدار کی مدت میں محض 3 ماہ باقی رہ گئے ہیں،پانچ سال قبل بی جے پی نے جو انتخابی وعدے پورے کئے تھے وہ کوئی وعدہ پورا نہیں ہوا ہے۔

بھوپیندر جادون نے کہا کہ یوگی حکومت کے دور میں ضلع کے تینوں اتھارٹی میں بدعنوانی میں کئی گنا اضافہ ہوگیا ہے۔ جس کی وجہ سے بہت سی اسکیمیں سنگ بنیاد رکھنے تک محدود ہیں اور چلہ ایلیویٹڈ روڈ، سالار پور ایلیویٹڈ روڈ کا کام نامکمل ہے۔ پانچ سالوں میں نوئیڈا میں کسانوں کے مسائل کا کوئی حل نہیں نکلا۔

انہوں نے کہا کہ گریٹر نوئیڈا اور یمنا اتھارٹی کے خلاف کسانوں کی تحریک چل رہی ہے، کسانوں کی آبادی اور گھروں کو ایئرکنڈیشنڈ دفتر میں بیٹھے بدعنوان عہدیداروں نے اتھارٹی کے نام رجسٹرڈ کر دیا اور اگر کسانوں کے مسائل حل نہیں ہوئے تو آنے والے وقت میں ضلع میں مزید بڑی تحریکیں نظر آئیں گی۔

بھوپندر جادون نے کہا کہ وزیر اعلیٰ یوگی آدتیہ ناتھ کو کسانوں سے ملنا چاہیے اور ان کے مسائل کو حل کرنا چاہیے ۔یہاں بنیادی سہولیات جیسے بجلی ، سڑکیں ، نالے اور سیور لائن سے لوگ محروم ہیں اور جہنمی زندگی گزارنے پر مجبور ہیں۔