کورونا کی چین توڑنے کے لیے سینیٹائزیشن کا عمل زور و شور سے جاری

عالمی وبا کورونا وائرس کی دوسری لہر سے ایک بار پھر عوام میں بے چینی پائی جارہی ہے۔ حکومت کی جانب سے مسلسل احتیاطی تدابیر پر سختی سے عمل کرنے کے تعلق سے نوٹیفکیشن جاری کیے جارہے ہیں۔

کورونا کی چین توڑنے کے لئے پورے اترپردیس میں 35 گھنٹے کا کرفیو نافذ کیا گیا ہے، جس کے سبب نوئیڈا کی سڑکیں خالی ہیں، ہر طرف سناٹا پسرا ہوا ہے، لوگوں نے اپنے آپ کو گھروں میں قید کر رکھا ہے۔

اس دوران فائربریگیڈ اور نوئیڈا اتھارٹی کے افسران کے ذریعے بازار اور رہائشی علاقوں میں سینیٹائزیشن کا عمل جاری ہے۔ دیگر علاقوں کے بازاروں کو بھی سینیٹائز کیا جا رہا ہے۔ صرف ہنگامی خدمات بحال ہیں۔

کنٹینمنٹ زون کو بھی سینیٹائز کیا جا رہا ہے۔ فائر بریگیڈ کی 11 گاڑیاں سینیٹائزیشن کے عمل میں مصروف ہیں۔ پولیس کی شدید چیکنگ جاری ہے۔ ایمبولنس اور انتہائی ضروری سروس والی گاڑیوں کو نوئیڈا میں انٹری دی جا رہی ہے۔ دیگر گاڑیوں کو واپس بھیجا جا رہا ہے۔