کانگریس کارکنان نے جھاڑو لگا کر پرینکا گاندھی کے ساتھ یکجہتی کا اظہار کیا

نوئیڈا مہانگر کانگریس کمیٹی کے ذریعہ ڈسٹرکٹ ہسپتال نوئیڈا کے باہر جھاڑو لگا کر وزیر اعلیٰ اتر پردیش کو جواب دیا ہے اور پرینکا گاندھی سے یکجہتی دکھائی۔

مہا نگر صدر شہاب الدین کی قیادت میں تمام عہدیداروں نے جھاڑو لگا کر وزیراعلیٰ یوگی کو جواب دیا جنہوں نے پرینکا گاندھی کے جھاڑو لگانے پر مذاق اڑایا تھا۔

شہاب الدین نے کہا کہ برسراقتدار رہنماؤں کے بیانات سے تکبر جھلکتا ہے۔ انہیں جھاڑو لگانے والا حقیر اور گندا نظر آتا ہے۔ یہ ان کی دلت مخالف سوچ کو بے نقاب کرتی ہے۔

کانگریس کارکنان نے جھاڑو لگا کر پرینکا سے یکجہتی دکھائی اور یوگی کو جواب دیا

انہوں نے کہا کہ اتر پردیش کے وزیر اعلیٰ یوگی آدتیہ ناتھ نے ہماری رہنما پرینکا گاندھی اور دیگر خواتین اور دلتوں کے خلاف جو نازیبا تبصرہ کئے ہیں ہم اس کے خلاف جھاڑو لگا کر احتجاج درج کرا رہے ہیں۔

بی جے پی کو تمسخر اڑانے کا یہ عمل بھاری پڑے گا۔ پرینکا گاندھی کی مقبولیت اور کانگریس کی پیشرفت سے برسراقتدار پارٹی میں بے چینی پائی جا رہی ہے، ایسے بیان اسی بے چینی کا نتیجہ ہے۔

اس دوران شہاب الدین، پرشوتم ناگر ابھیشیک جین، جاوید خان، رضوان چودھری، جتندر امباوت، اندر جیت تیواری سمیت درجنوں کانگریس کے کارکنان موجود تھے۔