کانگریس وفد کو جیل میں قید کسانوں سے ملنے کی اجازت نہیں دی گئی

کسان اور کانگریس کارکنان مختلف مسائل کے حل کے لیے احتجاج کر رہے تھے۔ پولیس نے انہیں گرفتار کر کے جیل بھیج دیا اور انہیں ضمانت نہیں ملی۔

اترپردیش کے نوئیڈا میں پولیس انتظامیہ کا آمرانہ رویہ بدستور جاری ہے۔ ایک طرف جہاں اپنے جائز مطالبات کے لیے احتجاج کر رہے کسانوں کو زبردستی جیلوں میں ٹھونس دیا گیا وہیں دوسری جانب جیل انتظامیہ جیل میں قید کسانوں سے ملنے کی اجازت بھی نہیں دے رہی ہے۔

اتر پردیش کانگریس کمیٹی کا آٹھ رکنی وفد نوئیڈا اتھارٹی کے دفتر کے باہر دھرنا دینے کے الزام میں گرفتار کسانوں سے ملاقات کے لیے جیل پہنچا، لیکن جیل انتظامیہ نے ان سے ملاقات کی اجازت نہیں دی۔ کل عاپ کے وفد کو بھی نہیں ملنے دیا گیا تھا۔ وفد میں سابق وزرا ستیش شرما، دیپک کمار، اتر پردیش کانگریس کمیٹی کے سیکریٹری ویر سنگھ چودھری، نسیم خان، ضلعی صدر منوج چودھری، نوئیڈا صدر شہاب الدین، دنیش اوانہ، للت اوانہ اور پرشوتم ناگر اور چودھری رضوان شامل تھے جو آج ضلع جیل پہنچے۔

واضح رہے کہ کسان اور کانگریس کارکنان مختلف مسائل بشمول آبادی کے تصفیے، بڑھے ہوئے معاوضے کی ادائیگی کے لیے احتجاج کر رہے تھے۔ پولیس نے انہیں گرفتار کر کے جیل بھیج دیا اور اب تک انہیں ضمانت نہیں ملی ہے۔

جیل سپرنٹینڈنٹ ارون پرتاپ سنگھ نے کہا کہ کورونا وائرس انفیکشن کے رہنما خطوط کے مطابق کسی بھی قیدی سے ملنے کے لیے آر ٹی پی سی آر ٹیسٹ ضروری ہے۔