نوئیڈا: وبائی امراض سے تحفظ کے لئے انتظامیہ متحرک

پنچایت راج محکمہ کے تحت ضلع کے تمام دیہی علاقوں میں بیداری پروگرام باقاعدگی سے جاری ہے تاکہ علاقوں کے تمام باشندوں کو کورونا وائرس و دیگر انفیکشن اور ویکٹر سے ہونے والی بیماریوں سے بچایا جاسکے۔

نوئیڈا کی عوام کو ویکٹر سے پیدا ہونے والی بیماریوں اور وبائی امراض سے تحفظ کے لئے اترپردیش حکومت اور انتظامیہ کے گائڈ لائن پر عمل کرتے ہوئے نوڈل آفیسر نریندر بھوشن، پولیس کمشنر آلوک سنگھ اور ضلع مجسٹریٹ سہاس ایل وائی کی سربراہی میں محکمہ جاتی افسران مختلف ذرائع سے وسیع پیمانے پر بیداری اور تشہیری پروگرام انجام دے رہے ہیں۔

ضلع پنچایت راج آفیسر کنور سنگھ یادو اور ان کی محکمہ جاتی صفائی ٹیم نے دیہی علاقوں میں بلاک دنکور کے تحت گرام پنچایت چیٹی میں بڑے پیمانے پر آگاہی اور بیداری عمل کو یقینی بنایا ہے۔ اس سلسلے میں چیف ڈویلپمنٹ آفیسر انل کمار سنگھ نے مطلع کیا ہے کہ پنچایت راج محکمہ کے توسط سے ضلع کے تمام دیہی علاقوں میں یہ پروگرام باقاعدگی سے جاری ہے اور گاؤں والوں کو آگاہ کرنے کے لئے یہ کارروائی کی جارہی ہے تاکہ علاقوں کے تمام شہریوں کو کورونا وائرس و دیگر انفیکشن اور ویکٹر سے ہونے والی بیماریوں سے بچایا جاسکے۔