تلنگانہ کےوزیر جنگلات اندراکرن ریڈی نے ضلع نرمل کلکٹریٹ کانفرنس ہال میں کوویڈ-19 سے متعلق ضلع انتظامیہ کے اقدامات سے میڈیا کو واقف کرایا۔
آج ساری دنیا میں کورونا وائرس کی تباہی کا سلسلہ جاری ہے ۔ وہیں ہمارے ملک کے کئی علاقے اس کی لپیٹ میں ہیں ۔ احتیاطی اقدامات میں کوئی کمی نہیں کی جاری ہے ۔ تاہم عوام سے اپیل کی جاتی ہے کہ وہ اپنے اپنے گھروں سے باہر نہ نکلیں ان خیالات کا اظہار ریاستی وزیر جنگلات اے اندرا کرن ریڈی نے آج دوپہر کلکٹریٹ کے کانفرنس ہال میں میڈیا سے بات کرتے ہوئے کیا۔
ریاستی وزیر نے بتایا کہ اس وباء پر قابو پانے کیلئے سوائے احتیاط کے اور کوئی راستہ نہیں ہے ۔ ضلع انتظامیہ پوری طرح سے متحرک ہے ۔ عوام کو ہر طرح کی سہولتیں مہیا کی جارہی ہیں ۔ سبزی بھی ضلع کلکٹر کی راست نگرانی میں عوام کے گھروں تک پہونچائی جارہی ہے ۔
لہذا عوام کو چاہئے کہ وہ بھی حکومت کے ہدایات پر عمل آوری کرتے ہوئے اس وباء سے محفوظ رہیں ۔
ضلع کلکٹر مشرف علی نے کہا کہ عوام کی زندگیوں کا تحفظ کرنے کیلئے ہر ممکنہ قدم اٹھائے جارہے ہیں ۔ عوام کی ذمہ داری ہے کہ وہ تمام سرکاری عہدیداروں سے تعاون کرتے ہوئے اپنے آپ کو گھروں میں محفوظ رکھیں ۔ ریاستی حکومت اور مرکزی حکومت کی تمام ہدایات کو روبہ عمل لایا جارہا ہے ۔
