مالیگاؤں: لاک ڈائون کے خلاف علامتی احتجاج

مسلم اکثریتی شہر کی شناخت رکھنے والے شہر مالیگاؤں میں رمضان المبارک کے پیش نظر کاروباری افراد اور دکاندار لاک ڈاؤن کی مخالفت پر آمادہ ہو گئے ہیں اور اس ضمن میں سیاسی لیڈران بھی انکی حمایت کر رہے ہیں۔

ریاست مہاراشٹر کے ناسک ضلع کے لیے نئی گائیڈ لائن جاری کی گئی جس کے پیش نظر 6 اپریل کی صبح پولیس انتظامیہ شہر مالیگاؤں کے کاروباری علاقوں کو اچانک بند کروانے میں مصروف نظر آئی۔

بعد ازاں دکانداروں اور تاجرین نے سیاسی لیڈران اور سماجی کارکنان سے رابطہ کیا۔ اور اس بات کی اطلاع دی کہ پولیس اچانک تمام دکانیں بند کرا رہی ہے۔ اس سلسلے میں شہر کی سماجی، سیاسی، ملی تنظیموں کی جانب سے لاک ڈاؤن کی سخت الفاظ میں مخالفت کرتے ہوئے حکومت کے خلاف نعرے بازی کی گئی اور زبردست احتجاج بھی کیا گیا۔

اس ضمن میں مجلس اتحاد المسلمین نے رکن اسمبلی مفتی محمد اسماعیل کی قیادت میں جمعرات کی صبح 11 بجے امبیڈکر مجسمہ کے پاس ایک علامتی احتجاج کرنے کا اعلان کیا گیا ہے۔

مجلس اتحاد المسلمین کے کارپوریٹر خالد پرویز نے عوام سے اپیل کی ہے کہ اس احتجاج میں شرکت کرنے والے ماسک ضرور پہنیں و سماجی فاصلے کا بھی خیال رکھیں۔