مہاراشٹر کے ضلع ناسک میں لاک ڈاؤن نافذ ہے ایسے میں لاک ڈاؤن کی خلاف ورزی کرنے پر دوکانداروں اور ہوٹلوں کے ساتھ ساتھ ماسک کا استعمال نہ کرنے والے لوگوں پر انتظامیہ سخت کارروائی کر رہی ہے۔
کورونا وائرس کی روک تھام کے لیے ریاست بھر میں (بریک دی چین) کے تحت سخت پابندیاں نافذ کی گئی ہیں جن میں صرف ضروری اشیاء کی خرید و فروخت اور ضروری اقدامات کی ہی اجازت دی گئی ہے۔
گزشتہ روز مالیگاؤں میونسپل کارپوریشن کے کمشنر بھال چندر گوساوی کی ہدایت پر کورونا قواعد کی خلاف ورزی کرنے والوں کے خلاف موسم پل پر واقع انڈیا بوٹک (ریڈی میڈ ملبوسات شورم) پر کاروائی کی گئی کیونکہ ریڈی میڈ ملبوسات کا یہ شو روم مقرر وقت کے بعد بھی کھلا ہوا تھا۔ جس کی وجہ سے شو روم پر 20 ہزار روپیہ کا جرمانہ عائد کیا گیا۔
ریڈی میڈ ملبوسات کے اس شو روم میں 15 گراہک بھی موجود تھے جن پر فی صارف ایک ہزار روپئے کا جرمانہ عائد کیا گیا اور مقرر وقت سے زیادہ دیر تک شو روم کھلے رکھنے پر 5 ہزار کا جرمانہ وصول کرنے کے بعد شورم کو سیل کردیا گیا۔
اس موقع پر کمشنر بھال چندر گوساوی نے عوام قواعد کی پاسداری اور احتیاطی تدابیر پر مکمل عمل کرنے کی اپیل کی ہے۔