مظفر نگر: سماج وادی پارٹی کا مہنگائی کے خلاف مظاہرہ

اترپردیش کے ضلع مظفرنگر کے مرکزی چوراہا اہلیہ بائی چوک پر ملک میں پٹرول ڈیزل اور رسوئی گیس کی قیمتوں میں ہو رہے مسلسل اضافے کے خلاف سماجوادی پارٹی نے زبردست احتجاجی مظاہرہ کیا۔

ملک میں بڑھتی مہنگائی کے خلاف سماج وادی پارٹی کے کارکنان اور عہدے داروں نے شہر کے مرکزی چوراہا اہلیہ بائی چوک پر ہاتھوں میں سلینڈر اور تختیاں اٹھا کر زبردست مظاہرہ کیا۔

سماج وادی پارٹی نے مرکزی چوراہے سے شیو چوک تک کے لیے بائیک ریلی نکالی لیکن پولیس انتظامیہ نے ان کو اہلیہ بائی چوک پر ہی روک لیا۔ اس دوران ان کی پولیس کے ساتھ نوک جھونک بھی ہوئی۔ مظفر نگر ایس ڈی ایم صدر دیپک کمار نے میمورنڈم لے کر مظاہرہ ختم کروادیا۔

اس میمورنڈم میں مطالبہ کیا گیا ہے کہ مرکزی حکومت کے ذریعہ پٹرول ڈیزل رسوئی گیس کی قیمتوں میں بے تحاشہ اضافہ کی وجہ سے عوام کو کافی مشکلات کا سامنا کرنا پڑ رہا ہے جس سے ان کے گھر کا بجٹ بگڑ گیا ہے۔

سماجوادی پارٹی پٹرول ڈیزل رسوئی گیس جیسی ضروری اشیاء کی قیمتوں میں ہو رہے اضافے کی سخت مخالفت کرتی ہے اور حکومت سے مطالبہ کرتی ہے کی اس بڑھتی مہنگائی پر روک لگائی جائے جس سے عوام کو پریشانی نہ ہو۔