اُتر پردیش کے ضلع مظفر نگر کے کلکٹریٹ کے احاطے میں ارچک پروہت سنگھ نے برہمنوں پر ہو رہے ظلم اور قتل معاملے کے خلاف احتجاج کیا اور ضلع مجسٹریٹ کے ذریعہ ملک کے وزیرِ اعظم کے نام ایک میمورنڈم دیتے ہوئے مطالبہ کیا کہ ہمارے طبقے کے ساتھ ہورہی ظلم و زیادتی کو ختم کیا جائے اور جلد از جلد اس معاملے کی جانچ کر کارروائی کی جائے۔
ارچک پروہت سنگھ کے ضلع صدر پنڈت برج بہاری اتری نے کہا کہ برہمن طبقے کے لوگ خود کو غیر محفوظ محسوس کر رہے ہیں۔ رائے بریلی میں انچاہار کے 5 معصوم برہمن نوجوانوں کو زندہ جلایا گیا، تب سے برہمن معاشرے کے لوگوں کا قتل مسلسل بڑھتا ہی جارہا ہے۔ سہارنپور کے ننوتا قصبے کے کلر پور گاؤں میں پنڈت رام کمار شرما کو مجرموں نے زندہ جلا دیا۔ لکھنؤ میں کملیش تیواری جیسے رہنما کا عوامی طور پر قتل کیا گیا، صحافی وکرم جوشی کو غازی آباد میں قتل کیا گیا، اب تک کافی برہمنوں کا قتل کیا جاچکا ہے۔ انہوں نے کہا کہ اگر برہمنوں کو اسی طرح سے تشدد کا نشانہ بنایا جاتا رہا اور قتل کیا جاتا رہا تو ارچک پروہت سنگھ سڑکوں پر اُتر کر زبردست احتجاجی مظاہرہ کریگا۔