'مہاراشٹراسمبلی میں اب عام لوگوں کو بھی جانے کی اجازت ہوگی'

مہاراشٹر کی قانون سازکونسل بھی عام آدمی کے لئے لندن اور بھارتی پارلیمنٹ کی طرز پر کھول دی جائے گی۔

مہاراشٹر اسمبلی اسپیکر نانا پاٹول اور وزیر سیاحت آدتیہ ٹھاکرے کے مابین ایک مشترکہ اجلاس میں یہ بات ہوئی تھی کہ ایک عام آدمی کو بھی اسمبلی کو دیکھنے کا موقع ملنا چاہئے، بہت سارے لوگ اسے دیکھنا چاہتے ہیں اور یہاں کی تاریخ جاننا چاہتے ہیں؟ لیکن عام آدمی کو 'سیکیورٹی' کے نام پر داخلہ نہیں دیا جاتا ہے۔

'مہاراشٹراسمبلی میں اب عام لوگوں کو بھی جانے کی اجازت ہوگی'

انہوں نے مزید کہا کہ' اس سے صرف سیاحت کو ہی فروغ نہیں ملے گا بلکہ نئی نسل کو اس سے تحریک ملے گی'۔ وزیر سیاحت آدتیہ ٹھاکرے کے اقدام پر ودھان بھون میں اسمبلی سکریٹریٹ، محکمہ داخلہ اور سیاحت کا مشترکہ اجلاس منعقد کیا گیا جس میں عام آدمی کو داخلہ دینے کا فیصلہ کیا گیا۔اپنے خیالات کا اظہار کرتے ہوئے اسمبلی اسپیکر نانا پاٹولے نے کہا کہ' مہاراشٹر اسمبلی کی ایک الگ روایت ہے۔ اس کی ایک شاندار تاریخ ہے'۔

انہوں نےکہاکہ'یہاں آنے والوں کو اور خصوصاً نوجوان نسل کو اس بارے میں معلومات حاصل ہوں گی۔ اس سے انہیں نئی سمت اور تحریک ملے گی۔اسمبلی اسپیکر پٹولے نے کہا کہ' ابتدائی طور پر یہ سہولت ممبئی اسمبلی میں شروع ہوگی اس کے بعد ناگپور اور پونے اسمبلی کی عمارتیں بھی عام لوگوں کے لئے کھول دی جائیں گی۔

آدتیہ ٹھاکرے نے مزید کہا کہ' اسمبلی کی عمارتوں کو کھولنے پرفائدہ ہی ہوگا اس سے نقصان کچھ بھی نہیں ہے۔ اگرچہ یہاں کی تاریخ نوجوانوں کو متاثر کرے گی اور سیاحت کو فروغ ملے گا۔ جب سیاحت کو فروغ ملے گاتو ملازمت کے مواقع پیدا ہوں گے۔

بہت جلدریاستی 'محکمہ سیاحت' قانون سازی سیکرٹریٹ اور محکمہ داخلہ عام آدمی کے داخلے کے لئے اصول و ضوابط تشکیل دیں گے۔ مختلف سہولیات جیسے استقبالیہ کمرے، سیاحوں کی اسکریننگ، آن لائن بکنگ مہیا کرنے کی بھی ہدایت کی۔

اس میٹنگ میں محکمہ سیاحت کے پرنسپل سکریٹری ولسانائر سنگھ، مہاراشٹر ٹورزم ڈیولپمنٹ مہامنڈل کے منیجنگ ڈائریکٹر آشوتوش سائل، اسسٹنٹ کمشنر پولیس وشواس نانگرے پاٹل، ڈپٹی سکریٹری پبلک ورکس راجندر جاوزاد، ڈپٹی سکریٹری قانون ساز سیکرٹریٹ ولاس اٹھاوالے، چیف سیکیورٹی آفیسر مہیش چمٹے اور دیگر سینئر شریک تھے۔