مہاراشٹر کے گورنر کو ارنب گوسوامی کے لیے تشویش

مہاراشٹر کے گورنر بھگت سنگھ کوشیاری نے ری پبلک ٹی وی کے ایڈیٹر ان چیف ارنب گوسوامی کی صحت کے بارے میں تشویش کا اظہار کیا ہے اور راج بھون ذرائع کے مطابق گورنر بھگت سنگھ کوشیاری نے ریاستی وزیر داخلہ انل دیشمکھ سے بات کی ہے۔

مہاراشٹر کے گورنر نے وزیر داخلہ انل دیشمکھ سے گرفتار کیے گئے ری پبلک ٹی وی کے ایڈیٹر ارنب گوسوامی کی سلامتی اور صحت سے متعلق اپنی تشویش سے آگاہ کیا۔ انہوں نے وزیر داخلہ سے گوسوامی کے اہل خانہ سے ملاقات کی اجازت دینے کا بھی مطالبہ کیا ہے۔

ارنب گوسوامی، جنھیں ممبئی پولیس نے 4 نومبر کو 2018 کے خودکشی کے ایک معاملے کے سلسلے میں حراست میں لیا تھا۔ انہوں نے الزام لگایا تھا کہ انھیں تشدد کا نشانہ بنایا جارہا ہے اور انھیں بات کرنے کی اجازت نہیں دی جارہی ہے۔ ارنب اپنے وکیلوں سے ملنے کا مطالبہ بھی کررہے ہیں۔ اتوار کے روز ایک وین سے ری پبلک ٹی وی کے نامہ نگاروں سے گفتگو کر رہے تھے کیونکہ انہیں اتوار کے روز علی باغ جیل قرنطینہ مرکز سے نوی ممبئی کے تلوجا جیل منتقل کر دیا گیا۔