تیاست مہاراشٹر کے مانخورد شیواجی نگر گوونڈی میں قومی کینسر بیداری کے موقع پر سماج وادی پارٹی کی جانب سے رکن اسمبلی ابو عاصم اعظمی کی سربراہی میں ایک مفت کینسر جانچ کیمپ کا انعقاد کیا گیا۔
کیمپ میں مقامی شہریوں کی ایک بڑی تعداد نے شرکت کی، نیز الکائن واٹر فلٹر مشین جو کینسر، ذیابیطس، کولیسٹرول، بلڈ پریشر جیسی بیماریوں کے علاج میں فائدہ مند ثابت ہورہی ہے، اس مشین کو گوونڈی سے رکن اسمبلی ابو عاصم اعظمی نے جلد ہی گوونڈی میں تنصیب کرانے کا اعلان کیا ہے۔
کیمپ میں ابوعاصم اعظمی نے مخاطب کرتے ہوئے کہا کہ ہر فرد کے لیے ضروری ہے کہ وہ اپنے گردونواح کو صاف رکھے، بچوں کو اچھی تعلیم دے اور بچوں کو منشیات سے دور رکھے گرچہ کہ اس کام کے لیے میونسپل کارپوریشن اور پولیس انتظامیہ ہے لیکن یہ ہر فرد کی ذمہ داری بھی ہے کہ وہ اپنے گردونواح کو صاف ستھرا رکھے اور اپنے بچوں کو منشیات سے دور رکھے۔
پروگرام میں ریاستی جنرل سکریٹری وکیل خان، کارپوریٹر اختر قریشی، کارپوریٹر رخسانہ صدیقی، تھانہ صدر غیاث الدین شیخ، ناظم صدیقی، رفیق شیخ، سابق وارڈ آفیسر دوویدی جی کے علاوہ سماج وادی پارٹی کے عہدیداران، کارکنان اور شہریوں نے بڑی تعداد میں شرکت کی۔