مالیگاؤں میں سول سروسز کی تیاریاں کیلئے ایک سینٹر کا قیام ضروری: اشفاق عمر

مہاراشٹر کے شہر مالیگاؤں کو گہوارہ ادب بھی کہا جاتا ہے جبکہ صنعتِ پارچہ بافی کے لیے ریاست بھر میں مشہور اس شہر میں متعدد گوہرِ نایاب موجود ہیں جنہوں نے اپنی ادبی و علمی تصنیفات سے ملک بھر میں اپنی صلاحیتوں کا ڈنکا بجایا اور شہر کو شہرت کی بلندیوں پر پہنچایا۔ ایسی ہی چنندہ شخصیات میں اشفاق عمر کا نام بھی شامل ہے۔ انہوں نے سول سروسز امتحان کی رہنمائی سے متعلق اردو میں جامع اور ضخیم کتاب لکھی ہے۔

مالیگاؤں کے اشفاق عمر سول سروسز امتحان کی رہنمائی کے لیے اردو میں لکھی اپنی کتاب ''رہنمائے سول سروسز'' کے لیے جانے جاتے ہیں۔ ان کی تعلیمی خدمات کا اعتراف کرتے ہوئے انہیں مہاراشٹر اسٹیٹ اردو ساہتیہ اکیڈیمی ممبئی کی جانب سے ایوارڈ و اعزاز سے نوازا گیا۔

اشفاق عمر نے نمائندے ای ٹی وی بھارت سے خاص بات چیت میں کہا کہ رہنمائے "سول سروسیز‘‘ نام کی کتاب لکھنے کا یہی مقصد ہے کہ مسلم طلباء و طالبات اعلیٰ سطح کے حکومتی امتحانات میں زیادہ سے زیادہ تعداد میں شرکت کریں اور کامیابی کے بعد اعلیٰ عہدوں پر فائز ہوسکیں۔ دوران گفتگو انہوں نے بتایا کہ وہ گزشتہ 25 برسوں سے تعلیم کے میدان سے منسلک ہے اور اردو زبان و ادب کی بے لوث خدمات انجام دے رہے ہیں۔

انہوں نے بتایا کہ ان کی ذاتی لائبریری میں ریاست مہاراشٹر کے پچھلے سو برسوں کی درستی کتابوں کا نایاب ذخیرہ (اردو اور مراٹھی میڈیم کی ہزاروں کتابیں) موجود ہے۔

ایک سوال کے جواب میں اشفاق عمر نے کہا کہ نئی دہلی اساتذہ کے کل ہند قومی مقابلے میں شامل ان کے تیار کردہ طریقہ تدریس کو پڑھانے کے ایک نئے تجربے کے طور پر قبول کرتے ہوئے انہیں قومی ایوارڈ سے سرفراز کیا تھا اور طلبا کو حکومتی سطح پر ملنے والی اسکالر شپ سے متعلق ان کی تحریر کردہ معلوماتی کتاب ’’رہنمائے اسکالر شپ‘‘ کافی مقبول ہوچکی ہے۔

اشفاق عمر نے کہا کہ آئندہ ماہ ان کی ایک کتاب رہنمائے مہاراشٹر اسٹیٹ سروسیز امتحان کے متعلق آنے والی ہے جس میں انہوں نے مہاراشٹر اسٹیٹ سروسیز امتحان کے تعلق سے مکمل رہنمائی کی ہے اور ہر مرحلہ کو واضح طور پر پیش کرنے کی کوشش کی ہے۔

انہوں نے اس بات پر روشنی ڈالی کہ وہ سول سروسیز امتحان اور اسکالرشپ اسکیمز کی طرف مسلسل کوشش کررہے ہیں تاکہ اسکالرشپ اسکیمز سے غریب طلبا و طالبات جو قابل اور ذہین ہیں، وہ ملک کے اعلیٰ ترین یونیورسٹیوں میں تعلیم حاصل کرسکیں۔

اشفاق عمر نے مقامی انتظامیہ اور رہنماؤں سے مطالبہ کیا کہ اگر مالیگاؤں میں سول سروسیز امتحان کی تیاریاں کے لیے ایک سینٹر کا قیام عمل میں لایا جائے تو اس سے لاکھوں طلبا و طالبات فیض یاب ہوں گے۔