خاتون ویٹرنری ڈاکٹر کے لیے کینڈل مارچ

صنعتی شہر بھیونڈی میں حیدرآباد کی خاتون ڈاکٹر کی اجتماعی آبروریزی اور قتل کیے جانے کے خلاف کینڈل مارچ نکال کر خاموش احتجاجی مظاہرہ کیا گیا۔

حیدرآباد میں خاتون ڈاکٹر کے ساتھ اجتماعی آبروریزی اور قتل کی واردات کے خلاف بھیونڈی شہر میں ایک مقامی تنظیم نے دیر رات کینڈل مارچ نکال کر خاموش احتجاج کرتے ہوئے ملزمین کو جلد از جلد پھانسی کی سزا دیئے جانے کا مطالبہ کیا۔

واضح رہے کہ ریاست آندھراپردیش کے شہر حیدرآباد میں گزشتہ جمعرات کو ایک ویٹرنری خاتون ڈاکٹر کی اجتماعی آبروریزی کے بعد جلا کر قتل کردیا گیا تھا۔

خیر ملت فاونڈیشن نامی تنظیم نے اس واردات کے خلاف احتجاج کرتے ہوئے کینڈل مارچ نکالا اور حکومت سے مطالبہ کیا کہ اس واردات میں ملوث تمام ملزمین کو فوراً پھانسی کی سزا دی جائے۔

دیر رات نکلنے والا یہ احتجاجی کینڈل مارچ بھیونڈی شہر کے کنھنڈوپاڑہ روڑ واقع فرید آرکیڈ سے ہوتے ہوئے مختلف مقامات سے گزرتا ہوا انصار محلہ چوک پر اختتام پذیر ہوا۔