بھیونڈی: ایک پرائیویٹ کووڈ ہسپتال کی منظوری مسترد

بھیونڈی میونسپل کمشنر نے ایک اسپیشل اسکوارڈ اور آڈٹ ٹیم تشکیل دے کر پرائیویٹ کووڈ اسپتالوں کے خلاف موصول ہونے والی شکایت کی جانچ کا حکم دیا ہے، فی الحال چار کووڈ ہسپتال کے خلاف جانچ جاری ہے جبکہ ایک نجی ہسپتال کی منظوری رد کردی گئی ہے۔ کارپوریشن کی اس کاروائی سے پرائیویٹ انتظامیہ میں زبردست ہلچل مچی ہوئی ہے۔

ریاست مہاراشٹر کے صنعتی شہر بھیونڈی میونسپل کمشنر نے ایک پرائیویٹ کووڈ 19 ہسپتال کی منظوری رد کرتے ہوئے نوٹس جاری کر جواب طلب کیا ہے۔

بھیونڈی کارپوریشن نے کورونا متاثرہ مریضوں کی تعداد میں اصافے کے پیش نظر شہر کے کچھ پرائیویٹ ہسپتالوں میں کورونا علاج کی منظوری دی تھی۔ مگر اب ان پرائیویٹ ہسپتالوں میں کورونا متاثرہ مریضوں کے علاج میں لاپرواہی، ڈاکٹرز اسٹاف کی کمی اور حکومت کے طے شدہ ریٹ سے زیادہ چارج کرنے کی شکایت پر کارپوریشن نے کاروائی شروع کردیا ہے۔

گذشتہ دنوں میونسپل انتظامیہ کارپوریشن کو شکایت موصول ہوئی کہ شہر میں واقع شری ورال دیوی کووڈ ہسپتال میں کورونا علاج کرانے کے لئے ماہر ڈاکٹرز کی ٹیم فزیشین اور اسٹاف نہ ہونے کے بعد بھی مریضوں سے اضافی بل وصول کئے جا رہے ہیں۔

جس پر میونسپل کمشنر پنکج آشیا نے ایک اسپیشل اسکوارڈ تشکیل دے کر تمام شکایت کی جانچ کرائی تو شکایت درست پائی گئی۔ معاملے پر فوراً کاروائی کرتے ہوئے ہسپتال میں کورونا متاثرہ مریضوں کے داخلے پر پابندی عائد کرتے ہوئے ہسپتال کو نوٹس جاری کر جواب طلب کیا ہے۔

اسپیشل اسکوارڈ کے ذریعہ شہر کے تمام نجی کووڈ ہسپتال میں کورونا متاثرہ مریضوں کی ہونے والی اموات جانچ اور اضافی بل کا آڈٹ کرنے کا حکم دیا ہے کمشنر کے اس سخت رویہ سے نجی کورونا ہسپتال مالکان میں زبردست ہلچل مچی ہوئی ہے۔

واضح رہے کہ' شری ورال دیوی ہسپتال میں رواں ماہ جولائی میں ہونے والی اموات کی شرح زیادہ ہونے کی تصدیق ہوئی ہے۔ میونسپل کمشنر ڈاکٹر پنکج آشیا نے مذکورہ ہسپتال میں نئے کورونا متاثرہ مریضوں کے داخلے پر پابندی عائد کر اس ہسپتال کے تمام مریضوں کو فوراً اندرا گاندھی سب ڈسٹرکٹ ہسپتال منتقل کرنے کا حکم دیا ہے۔

ہسپتال کی لاپرواہی پر نوٹس جاری کر تحریری جواب طلب کرتے ہوئے انتباہ دیا ہے کہ اگر ہسپتال نے جاری نوٹس کا جواب نہیں دیا تو اس کے خلاف فوجداری کا مقدمہ درج کیا جائے گا۔