لوک سبھا انتخاب کے دوران سماج وادی پارٹی کے سینیئر رہنما اور رامپور سے رکن پارلیمنٹ اعظم خان نے ایک انتخابی ریلی میں بھاجپا امیدوار جیا پردہ کے سلسلے میں قابل اعتراض بیان دیا گیا تھا جس کی وجہ سے ان کے خلاف مقدمہ بھی دائر کیا گیا تھا لیکن اب پولیس نے اس مقدمہ کی چارج شیٹ عدالت میں پیش کی ہے۔
ایس پی ارون کمار سنگھ کے مطابق اعظم خان کے بیان کی تحقیق کی گئی جسے جرم کی فہرست میں شمار کیا گیا ہے اسی وجہ سے ان کے خلاف عدالت میں چارج شیٹ داخل کی گئی ہے۔
واضح رہے کہ لوک سبھا انتخاب کے دوران 14 اپریل کو شاہ آباد میں سابق وزیر اعلی اکھیلیش یادو نے سپا امیدوار اعظم خان کے لیے ریلی کی تھی، اسی ریلی میں اعظم خان نے بھاجپا امیدوار جیا پردہ کے تعلق سے قابل اعتراض بیان دے دیا تھا، جس کے بعد اس قابل اعتراض بیان کی چوطرفہ مذمت شروع ہوگئی تھی۔
اعظم خان پر تنقید کے بعد خواتین کمیٹی نے بھی نوٹس جاری کردیا تھا، جس کے بعد ضلع مجسٹریٹ مہیش کمار گپتا نے شاہ آباد کوتوالی میں اعظم خان کے خلاف رپورٹ درج کرائی تھی، اسی معاملے میں شاہ آباد پولیس نے اب اعظم خان کے خلاف عدالت میں چارج شیٹ داخل کردی ہے۔