پیس پارٹی کے یوم تاسیس پر علماء کانفرنس کا انعقاد

دارالحکومت لکھنؤ میں پیس پارٹی کے یوم تاسیس پر ہونے والی تیسری 'علماء کانفرنس' کی تیّاریاں زورو شور سے جاری ہیں۔

ریاست اتر پردیش کے دارالحکومت لکھنؤ میں پیس پارٹی کی جانب سے 10 فروری 2021 کو اٹل بہاری واجپئی کنوینشن سینٹر میں پارٹی کے یوم تاسیس پر ہونے والی تیسری 'علماء کانفرنس' کی تیّاریوں کو لے کر پارٹی کے کارکنان اور عہدیداران جٹ گئے ہیں۔

لکھنؤ میں ہونے والی علماء کانفرنس میں مرادآباد سے پارٹی کے ضلع صدر نادر علی منصوری کی قیادت میں سینکڑوں کارکنان کانفرنس میں شرکت کریں گے۔

پیس پارٹی کے مرادآباد ضلع صدر نادر علی منصوری نے بتایا کہ 'پارٹی کا قیام 10 فروری 2008 میں ہوا تھا۔'

انہوں نے کہا کہ مرادآباد سے تقریبا دو بسیں علماء کانفرنس میں پہنچیں گی۔ ہماری پارٹی کے کارکنوں کے ساتھ ہی علماء بھی شامل رہیں گے۔ ہماری علماء سے گذارش ہے کہ وہ ہماری اس کانفرنس میں پہنچیں اور لوگوں کو خطاب کریں کیونکہ جس قوم کی قیادت نہیں ہوتی اس قوم کی حفاظت بھی نہیں ہوتی۔

نادر علی منصوری نے یہ بھی بتایا کہ سال 2022 کے الیکشن کے نظریہ سے بھی کانفرنس کو دیکھا جا سکتا ہے کیونکہ اس کانفرنس میں آنے والے الیکشن کے بارے میں بھی تبصرہ کیا جائے گا۔