مرادآباد: سڑک حادثے میں 6 افراد ہلاک، متعدد مسافر زخمی

ضلع مرادآباد کے تھانہ پاکباڑہ علاقے میں واقع لکھنؤ شاہراہ پر ایک خوفناک سڑک حادثہ پیش آیا ہے۔ ڈبل ڈیکر بس اور پک اپ بے قابو ہوکر الٹ گئی۔ اس حادثے میں 6 افراد کی موت ہوگئی ہے جب کہ 24 سے زائد مسافروں کے زخمی ہونے کی اطلاع ہے۔ زخمیوں کو علاج کے لیے ضلع ہسپتال میں داخل کیا گیا ہے۔ نجی بس پنجاب سے پیلی بھیت جارہی تھی۔

مرادآباد: صبح پانچ بجے ٹریفک پولیس گاڑیوں کی چیکنگ کر رہی تھی۔ تبھی پولیس نے پاکباڑے سے آرہی پک اپ کو روکنے کا اشارہ کیا، جیسے ہی پک اپ کے ڈرائیور نے گاڑی کی رفتار کو کم کیا، پیچھے سے آرہی ڈبل ڈیکر بس نے پک اپ کو ٹکر مار دی۔ پک اپ دور جاکر پلٹ گئی اور ساتھ ہی بس بھی بے قابو ہوکر پلٹ گئی۔

مقامی لوگوں کا کہنا ہے کہ ٹریفک پولیس صبح سویرے آتی ہے اور چیکنگ کے نام پر وصولی شروع کردیتی ہے، جس کی وجہ سے ہر روز حادثات ہوتے رہتے ہیں۔ آج اسی کا نتیجہ ہے کہ اتنا بڑا حادثہ پیش آیا۔

وزیر اعلیٰ یوگی آدتیہ ناتھ نے مرادآباد میں سڑک حادثے پر غم کا اظہار کیا ہے۔ سی ایم یوگی نے سینیئر افسران کو ہدایت کی ہے کہ وہ متاثرین کو ہر ممکن مدد فراہم کریں۔ زخمیوں کا فوری طور پر بہتر علاج معالجہ فراہم کرنے کی بھی ہدایت دی گئی ہے۔