مراد آباد: کانگریس صوبائی سکریٹری کی یوگی حکومت پر تنقید

ریاست اتر پردیش میں کانگریس کمیٹی کے صوبائی سکریٹری نے یوگی حکومت سمیت مرکزی سرکار کو تنقید کا نشانہ بناتے ہوئے کہا کہ حکومت کی پالیسیوں کی وجہ سے عام شہری پریشان ہیں۔

اتر پردیش حکومت کے تئیں ناراضگی کا اظہار کرتے ہوئے کانگریس کمیٹی کے صوبائی سکریٹری سچن چودھری نے کہا ’’اتر پردیش میں سرکاری اسپتالوں کے ایمبولینس ڈرائیور تقریباً چار دنوں سے اپنی مانگوں کو لے کر احتجاج کررہے ہیں لیکن حکومت کسی بھی قیمت پر ان کی داد رسی کے لیے تیار نہیں۔‘‘

انہوں نے کہا کہ ان ہی ایمبولینس ڈرائیوروں اور دیگر فرنٹ لائن واریئرز نے عالمی وبا کورونا وائرس کے دوران اپنی جان جوکھم میں ڈال کر عوامی خدمات انجام دیں اور آج یہی افراد اپنے بنیادی حق کے لیے ہڑتال کررہے ہیں۔

اتر پردیش کانگریس کمیٹی کے صوبائی سکریٹری نے یوگی حکومت سمیت مرکزی سرکار کی تنقید کرتے ہوئے کہا: ’’آج ہر شہری حکومت سے پریشان ہے، لیکن حکومت کو عوام کی کوئی پرواہ نہیں ہے۔‘‘

انہوں نے فلمی انداز میں تنقید کرتے ہوئے کہا: ’’آج پٹرول اور ڈیزل کی قیمتیں 100 کے پار ہے، رسوئی گیس 800 روپے میں ( ایک سیلنڈر) مل رہا ہے، اشیائے خوردنی کی قیمتیں آسمان چھورہی ہیں۔ باقی سب ٹھیک ہے۔‘‘

سچن چودھری نے مزید کہا کہ کسان مہینوں سے سڑکوں پر احتجاج کررہے ہیں، ریلوے، مواصلاتی اور بینک ملازمین نجکاری کے خلاف بھوک ہڑتال کررہے ہیں تاہم حکومت ٹس سے مس نہیں ہورہی۔ انہوں نے اتر پردیش کے وزیر اعلیٰ یوگی آدتیہ ناتھ کو تنقید کا نشانہ بناتے ہوئے انہیں مستعفی ہونے کا مشورہ دیا۔