مرادآباد: آوارہ جانوروں سے لوگ پریشان

ریاست اترپردیش کے مرادآباد ڈی ایم گیٹ پر آل انڈیا ڈیموکریٹک یوتھ آرگنائزیشن نے نگر نگم کے ملازموں کے خلاف احتجاج کیا۔ انہوں نے ڈی ایم راکیش کمار کو ایک میمورینڈم دے کر مطالبہ کیا کہ نگرنگم کے ملازموں پر قانونی کارروائی کی جائے۔

کشور اپادھیائے نے ای ٹی وی بھارت کے نمائندہ سے بات چیت کرتے ہوئے بتایا کہ 'شہر میں آئے دن آوارہ جانوروں مثلاً کتوں اور بندروں سے لوگ پریشان ہیں۔ مرادآباد نگر نگم کی لاپروائی کی وجہ سے آوارہ جانوروں کا خوف شہر میں بڑھتا ہی جا رہا ہے۔'

حالیہ دنوں میں مرادآباد میں ایک آوارہ سانڈ کے حملے سے نوجوان کاروباری اپار شکلا کی موت ہو گئی تھی۔ سانڈ کا سینگ اپار شکلا کے پیٹ میں گھس گیا تھا۔ اس کے علاوہ آوارہ جانوروں کے حملے سے متعدد لوگ شدید طور پر زخمی بھی ہو چکے ہیں۔