مرادآباد: رکن اسمبلی حاجی رضوان نے حکومت پر تنقید کی

رکن اسمبلی نے کہا کہ ریاستی و مرکزی حکومت جملہ بازی اور چندہ بازی کی حکومت ہے

ریاست اتر پردیش کے مرادآباد حلقہ اسمبلی کندرکی سے سماج وادی پارٹی کے رکن اسمبلی حاجی رضوان نے میڈیا سے بات چیت کرتے ہوئے کہا کہ کسان کئی مہینوں سے تین زرعی قوانین واپس کئے جانے کی حکومت سے مانگ کر رہے ہیں، کئی بار کسان اور حکومت کے درمیان نشستیں ہو چکی ہیں لیکن حکومت تین زرعی قوانین واپس نہیں کر رہی ہے یہ حکومت کی تانا شاہی ہے اور ایسے میں سماج وادی پارٹی کسانوں کی حمایت میں ہر وقت کھڑی ہے۔

رکن اسمبلی حاجی رضوان نے ایودھیہ میں رام مندر کی تعمیر کے لئے ملک بھر میں ہو رہے چندے پر بولتے ہوئے کہا کہ میڈیا میں لگاتار خبریں آرہی ہیں کہ چندے کے نام پر لوگوں کو فرضی رسیدیں کاٹ کر فرضی چندہ کیا جا رہا ہے، چندہ اکٹّھا کرنے کی کیا ضرورت ہے، مندر کی تعمیر تو ہو ہی جائے گی ان لوگوں کے پاس بہت پیسہ ہے۔ انہوں نے مزید کہا کہ یہ جملہ بازی کی اور چندہ بازی کی سرکار ہے، ملک کو چلانے کے لئے ان کے پاس کوئی منصوبہ نہیں ہے۔ انہوں نے محکمہ ریل، محکمہ صحت فروخت کر دیا، محکمہ بجلی بیچ دیا، بجلی لگاتار مہنگی ہوتی جا رہی ہے، ریلوے پلیٹ فارم ٹکٹ 10 روپیہ کا ملتا تھا وہ پلیٹ فارم ٹکٹ اب 50 روپیہ کا ہونے جارہا ہے۔