اس طرح سے قتل کیا جانا حکومت کی ناکامی ہے: چکر پانی مہاراج

ریاست اترپردیش کے ضلع بلند شہر میں دو سادھوؤں کے قتل کے بعد صوبے میں سیاسی رسہ کشی تیز ہوگئی ہے۔ جسے ہندو رہنما حکومت کی ناکامی بتا رہے ہیں۔ چکر پانی مہاراج نے کہا کہ یہاں قتل ہورہا ہے اور سیاسی جماعتیں سیاست کر رہی ہیں۔

آپ کو بتا دیں کہ کُچھ دنوں پہلے مہاراشٹر کے پال گھر میں دو سادھو اور ڈرائیور کے ساتھ ہجومی تشدد کا واقعہ پیش آیا تھا جس کے بعد ملک بھر میں اس کی مذمت کی گئی اور اسے ہندو مسلم رنگ دینے کی ناکام کوشش کی گئی تھی اور اب اُتر پردیش کے بلند شہر میں دو سادھوؤں کا قتل ہو گیا۔

اکھل بھارتیہ ہندو مہا سبھا کے قومی صدر چکر پانی مہا راج نے بلند شہر میں ہوئے دو سادھوؤں کے قتل پر سخت غم و غصہ کا اظہار کرتے ہوئے کہا کہ 'ہم نے مرکزی حکومت سے کافی پہلے مطالبہ کیا تھا کہ ہجومی تشدد کے خلاف سخت قانون بنایا جائے'۔

سادھو سنتوں کی حفاظت کے لئے اسپیشل قانون کے تحت فاسٹ کورٹ بنایا جائے لیکن افسوس کی بات ہے کہ ملک میں کہیں بھی سادھو سنتوں کا قتل ہوتا ہے تو بی جے پی کانگریس پر الزام لگاتی ہے اور کانگریس بی جے پی پر الزام تراشی کرتی ہے۔

انہوں نے کہا کہ میں پھر سے مرکزی حکومت سے مطالبہ کرتا ہوں کہ ماب لنچنگ پر سخت قانون بنایا جائے اور اور فاسٹ کورٹ میں ایسے معاملے کی سماعت ہو تاکہ انصاف جلد سے جلد مل سکے۔ اس طرح سے قتل ہونا حکومت کی ناکامی ہے۔