وزیراعظم نریندر مودی کے اعلان کے بعد پورے ملک میں لاک ڈاؤن نافذ کردیا گیا اور اب یہ لاک ڈاؤن 5 ویں دور میں آ پہنچا ہے، پورے ملک میں 30 جون تک لاک ڈاؤن ہے۔
لاک ڈاؤن کے باعث عام کاروباریوں سے لے کر محنت مزدوری کرنے والے مزدوروں کو بے حد پریشانیوں کا سامنا کرنا پڑ رہا ہے۔
اترپردیش کے مرادآباد جس کو لوگ عالمی سطح پر پیتل نگری کے نام سے جانتے ہیں۔ یہاں نقاشی و دستکاری کرنے والے مزدور کاریگر روزگار نہ ہونے کی وجہ سے بے حد پریشان ہیں۔ اس موضوع پر ای ٹی وی بھارت اردو سے بات کرتے ہوئے پیتل کاروباری اور کانگریسی رہنما صغیر سعید نے بتایا کہ مرکزی حکومت اور صوبائی حکومت عوام کو روزگار دینے میں ناکام ثابت ہوئی ہے۔
انہوں نے کہا کہ حکومت کی بے توجہی کے باعث مرادآباد کا پیتل کاروبار بدحال ہوچکا ہے اور اس لاک ڈاؤن کی وجہ یہاں سے غیر ملکوں میں ہونے والے پیتل کے کاروبار اب بدحالی کے شکار ہو چکے ہیں۔ ایسے میں یہاں پیتل کے کیگر اپنا روزگار کھوچکے ہیں۔
کانگریس رہنما نے کہا کہ مرکزی اور صوبائی حکومت جو منصوبے غریب، بے سہارا اور مزدوروں کے لیے چلا رہی ہے وہ زمینی سطح پر کھوکھلے ثابت ہو رہے ہیں۔