امروہہ: اجے کمار للو کی رہائی کا مطالبہ تیز، کانگریسی رہنماؤں کا احتجاج

ریاست اترپردیش کے ضلع امروہہ میں ضلع کانگریس کمیٹی کے کارکنان نے ریاستی کانگریس صدر اجے کمار للو کی رہائی کا مطالبہ کرتے ہوئے گاندھی مورتی پر احتجاج کیا۔

امروہہ میں ضلع کانگریسی کمیٹی کے صدر اوم کرکٹاریاں اور شہر کانگریس کمیٹی کے صدر پرویز عارف نے ریاستی کانگریسی کمیٹی کے صدر اجے کمار للو کی رہائی کے لیے زوردار احتجاج کیا۔

خیال رہے کہ اترپردیش کانگریس کمیٹی کے صدر اجے کمار للو کو یو پی پولیس نے 20 مئی کو گرفتار کیا تھا۔ اجے کمار للو پرینکا گاندھی کی پہل پر مزدوروں کے لیے بسز کو یو پی میں داخل کرانے کی کوشش کر رہے تھے۔ اسی دوران اترپردیش پولیس نے اجے کمار للو کو گرفتار کر کے جیل بھیج دیا تھا۔ کانگریس یوگی حکومت سے اجے کمار للو کی رہائی کا پر زور مطالبہ کر رہی ہے۔

کانگریس نے اجے کمار للو کی گرفتاری کے خلاف ریاست بھر میں سیوا ستیہ گرہ مہم چلائی اور یوگی حکومت پر دباؤ بنانے کی کوشش کی۔

اس موقع پر شہر کانگریس کمیٹی کے صدر پرویز عارف نے کہا کہ 'کانگریس پارٹی، اترپردیش صدر اجے کمار للو کی رہائی کے لیے احتجاج کر رہی ہے۔ اترپردیش حکومت نے اجے کمار کو جھوٹے الزامات میں جیل میں بند کیا ہے جبکہ وہ صرف مزدوروں کی خدمات کو انجام دے رہے تھے۔'

انہوں نے کہا کہ 'ہمارا مطالبہ ہے کہ سرکار کانگریس کے سبھی رہنماوں پر لگائے گئے مقدمات جلد سے جلد واپس لے اور انہیں رہا کرے'۔