میرٹھ میں ایم آئی ایم کی ریلی کو کیوں نہیں ملی اجازت؟

میرٹھ میں ایم آئی ایم کی طے شدہ ریلی کو ایک دن قبل ضلع انتظامیہ کی جانب سے روکے جانے پر ایم آئی ایم یوپی کے صدر شوکت علی نے کہا کہ سیاسی دباو کی وجہ سے انتظامیہ نے یہ قدم اٹھایا ہے جبکہ ضلع انتظامیہ کے بقول جس زمین پر یہ ریلی منعقد کی جانے والی تھی اس زمین کے مالک نے ریلی کی اجازت نہیں دی تھی جس کی وجہ سے ریلی کی منظوری نہیں دی گئی۔

یوپی اسمبلی انتخابات کی تیاریوں کو لیکر ایک طرف جہاں تمام سیاسی جماعتیں ریلیاں کررہی ہیں وہیں آل انڈیا مجلس اتحاد المسلمین کی جانب سے یوپی کے مختلف اضلاع میں ریلی منعقد کر اپنی سیاسی بساط کو مزید مضبوط کرنے کی کوشش کررہی ہے۔

اسی ضمن میں آج میرٹھ کے نوچندی میدان میں اسدالدین اویسی کی انتخابی ریلی تھی لیکن ضلع انتظامیہ نے ریلی سے ایک دن قبل طے شدہ ریلی کو منظوری نہیں دی۔

ریلی منسوخ ہونے کے بعد آل انڈیا مجلس اتحاد المسلمین یوپی کے صدر شوکت علی نے پریس کانفرنس کر کے انتظامیہ کو اس کا ذمہ دار قرار دیا اور کہا کہ سیاسی دباؤ کی وجہ سے ایم آئی ایم کو ریلی کرنے سے روکا جارہا ہے۔

وہیں پولیس انتظامیہ کی جانب سے ریلی کی جگہ کو متنازعہ بتاتے ہوئے دوسری جگہ پر ریلی کرنے کی بات کہی جا رہی ہے اور پارٹی کی جانب سے زمین کے مالک سے منظوری کی درخواست حاصل نہ ہونے سے ریلی کو روکا گیا ہے۔