میرٹھ: نجی اسکولوں کی من مانی اور مہنگائی کے خلاف احتجاج

پرائیویٹ اسکولوں میں منمانی فیس وصول کرنے اور بے لگام مہنگائی کے خلاف ضلع میرٹھ میں کلکٹریٹ آفس کے باہر اندر پرستھ سنگھرش مورچہ کے کارکنان نے احتجاج کیا۔ اس موقع پر تنظیم کے ذمہ داروں نے صدر جمہوریہ کے نام ایک میمورنڈم سونپ کر، مشترکہ طورپر خود کشی کی اجازت طلب کی۔

اترپردیش کے ضلع میرٹھ کی سماجی تنظیم اندر پرستھ سنگھرش مورچہ کے ساتھ ساتھ پرائیوٹ اسکولی بچوں کے والدین نے نجی اسکولوں کی جانب وصول کی جارہی موٹی فیس اور ملک میں بڑھتی مہنگائی کے خلاف میرٹھ کلکٹریٹ پر احتجاجی مظاہرہ کیا اور صدر جمہوریہ کے نام ایک میمورنڈم روانہ کیا۔ میمورنڈم میں والدین کے ساتھ تنظیم کے کارکنان نے مشترکہ طور پر خودکشی کی اجازت طلب کی۔

مظاہرین کا کہنا تھا کہ' کورونا کے دوران لگے لاک ڈاؤن کے سبب بڑھی بے روزگاری کی وجہ سے پریشان والدین اسکولوں کی من مانی فیس کیسے جمع کریں، اس لئے وہ خود کشی کرنے کو تیار ہیں۔

ملک میں کورونا وبا کے بعد مشکل دور سے زندگی گزار رہے لوگ اب بچوں کی فیس کے دباؤ کے خلاف احتجاج سے ایک بات تو صاف ہے کہ ملک میں سب کچھ صحیح نہیں ہے۔ فی الحال حکومت کو مہنگائی پر قابو کرنے کے ساتھ نجی اسکولوں پر بھی لگام لگانے کی ضرورت ہے۔