ریاست اترپردیش میں کورونا وائرس کی دوسری لہر میں کمی آنے کے بعد ریاستی حکومت نے 20 اضلاع کے علاوہ تمام اضلاع میں لاک ڈاؤن اور کرفیو میں رعایت دی ہے۔ اسی طرز پر میرٹھ کے کاروباری بھی حکومت سے چند شرائط کے ساتھ لاک ڈاؤن میں رعایت کا مطالبہ کر رہے ہیں۔
حکومت نے یوپی کے 20 اضلاع میں ابھی بھی لاک ڈاؤن کو برقرار رکھا ہے۔ ایسے میں میرٹھ کے کاروباری اور سماجی تنظیم کے ذمہ داران اب حکومت سے میرٹھ کے بازاروں کو شرائط کے ساتھ کھولنے کا مطالبہ کر رہے ہیں۔
کاروباریوں کے مطابق تقریباً دو ماہ سے کاروبار مکمل طور سے بند ہے۔ ایسے حالات میں کاروباری معاشی بحران کا شکار ہو رہے ہیں، ساتھ ہی غریب مزدور طبقے کے سامنے بھی روزی روٹی کا سنگین مسئلہ پیدا ہوگیا ہے۔ اس صورت میں حکومت کو کورونا گائڈ لائن پر عمل کراتے ہوئے لاک ڈاؤن میں رعایت دینی چاہیے۔
