میرٹھ انتظامیہ نے ایم آئی ایم کو انتخابی ریلی کی اجازت نہیں دی

یوپی اسمبلی انتخابات کے پیش نظر میرٹھ میں آل انڈیا مجلس اتحاد المسلمین کی انتخابی ریلی کو ایک دن پہلے انتظامیہ کی جانب سے منسوخ کیے جانے پر پارٹی کے کارکنان نے ناراضگی کا اظہار کیا۔

ریاست اترپردیش میں اسمبلی انتخابات 2022 کے پیش نظر تمام سیاسی پارٹیاں تغ و دو کر رہی ہیں وہیں آل انڈیا مجلس اتحاد المسلمین نے بھی یوپی میں اس مرتبہ انتخابی لڑائی لڑنے کا اعلان کردیا ہے، جس کے بعد ایم ریاست کے مختلف مقامات پر اپنی سیاسی ریلیاں بھی منعقد کرکے عوام کو اپنی جانب راغب کرنے کی کوشش کر رہی ہے۔

اسی ضمن میں آج میرٹھ کے نوچندی میدان میں آل انڈیا مجلس اتحاد المسلمین کی جانب سے ایک بڑی انتخابی ریلی منعقد کی جانی تھی لیکن ایک دن قبل انتظامیہ کی طرف سے ریلی کی منظوری نہ دیے جانے سے پارٹی لیڈران ناراضگی کا اظہار کر رہے ہیں۔

ایم آئی ایم کی ریلی منسوخ ہونے کے بعد پارٹی کے کارکنان کا کہنا ہے کہ یوپی میں موجودہ سرکار کے علاوہ سیکولر کا دم بھرنے والی سیاسی جماعتیں اسد الدین اویسی کی طاقت سے گھبرا رہی ہیں اور یہی وجہ ہے کہ ان کو ریلی کرنے کی اجازت نہیں دی جا رہی ہے۔

انھوں نے یہ بھی کہا کہ جو کام پہلے سماج وادی پارٹی کررہی تھی اب وہی کام بی جے پی بھی کررہی ہے ۔ لیکن ان کو یہ نہیں معلوم ہے کہ اب ہم زیادہ جوش کے ساتھ جلد میرٹھ میں ریلی کرکے مخالف جماعتوں کو اس کا جواب دینگے۔