ہندو مہاسبھا نے یوم سیاہ منایا

آج یعنی دو اکتوبر کو جہاں پوری دنیا میں بابائے قوم مہاتما گاندھی کی 150 ویں یوم پیدائش منائی جا رہی ہے اور انہیں مختلف انداز میں خراج عقیدت پیش کی جا رہی ہے وہی اتر پردیش کے ضلع میرٹھ میں ہندو مہاسبھا کے نائب صدر پنڈت اشوک نے مہاتما گاندھی پر متنازع بیان دیا اور گاندھی کے قاتل ناتھو رام گوڈسے کے مجسمے پر پھول ڈال کر پوجا کی اور سیاہ دن منایا۔

میرٹھ کے شاردا روڈ پر واقع مندر میں اکھل بھارت ہندو مہاسبھا تنظیم کے قومی نائب صدر پنڈت اشوک نے کہا کہ 'گاندھی کی وجہ سے بھارت اور پاکستان بنا۔ گاندھی کی وجہ سے لاکھوں انسانوں کا قتل عام ہوا۔ ایسے میں گاندھی کی اتنی اعلی پیمانے پر یوم پیدائش منانا بی جے پی کے لئے شرمناک ہے'۔

انہوں نے کہا کہ تقسیم ہند کے وقت ہلاک ہونے والے افراد کو یاد کیا جانا چاہیے۔

سخت گیر ہندو تنظیم آر ایس ایس کو نشانہ بناتے ہوئے انہوں نے کہا کہ 'ان کا ہندوتوا کمزور ہوگیا ہے۔ آر ایس ایس دوہری پالیسی اختیار کر رہی ہے'۔ انہوں نے کہا کہ 'ہندو مہاسبھا کا ہندوتوا آر ایس ایس کے ہندوتوا سے بہت مضبوط ہے'۔

بابائے قوم مہاتما گاندھی کے قاتل ناتھورام گوڈسے کو عظیم ہستی بتاتے ہوئے پنڈت اشوک نے کہا کہ 'جنگ آزادی میں گاندھی نے کوئی خاص کردار ادا نہیں کیا'۔

انہوں نے بی جے پی کو نشانہ بنایا کہ اگر مہاتماگاندھی کو بی جے پی فادر آف دی نیشن مانتی ہے تو حالیہ دنوں میں امریکہ کے صدر ڈونلڈ ٹرمپ نے وزیر اعظم نریندر مودی کو فادر آف دی نیشن کہا تو وزیراعظم نے انکار کیوں نہیں کیا۔ اس کا صاف مطلب ہے کہ بی جے پی گاندھی کو فادر آف نہیں مانتی ہے۔

انہوں نے کہا کہ 'اگر بی جے پی گاندھی کی پالیسیز کو اپناتی ہے تو پھر کشمیر میں پھول اور چرکھا بھیجنا چاہیے کشمیر میں فوج بھیج کر کے گوڈسے کے پالیسی کو کیوں اپنا رہی ہے'۔